ఆ రెండు నగరాల్లో కొత్త ప్రాజెక్టులు

ఈనాడు, హైదరాబాద్‌: దేశంలోని ఏడు అగ్రశ్రేణి నగరాల్లో గత ఏడాది కంటే ఈ ఏడాది రెండో త్రైమాసికంలో 25 శాతం అధికంగా కొత్త ప్రాజెక్ట్‌లు ప్రారంభం అయ్యాయి. వీటిలో 1.02 లక్షల ఇళ్లు ఉన్నాయి. గత ఏడాది 82,500 యూనిట్లు మాత్రమే మొదలయ్యాయి.

• ఆర్థిక రాజధాని ముంబయి వాటానే 43 శాతంపైగా ఉంది. ఇక్కడ 43,390 యూనిట్లు ప్రారంభం అయ్యాయి. క్రితం ఏడాదితో పోలిస్తే 31 శాతం పెరిగాయి. మొత్తం కొత్త ప్రాజెక్టులో 61 శాతం రూ.80 లక్షల బడ్జెట్‌ ధరల్లోనివే.
• పుణెలోనూ ప్రారంభాలు సానుకూలంగా ఉన్నాయి. 21,350 యూనిట్లు ప్రారంభించారు. అంతక్రితం ఏడాది 16,560 ఇళ్లు చేపట్టారు. పెరుగుదల శాతం 29గా ఉంది.
• హైదరాబాద్‌లో మార్కెట్‌ స్తబ్దుగా ఉంది. ఇక్కడ కొత్తగా 10,470 యూనిట్లు మాత్రమే మొదలయ్యాయని అనరాక్‌ సంస్థ వెల్లడించింది. గతంతో పోలిస్తే తగ్గడం గమనార్హం. కొత్తవాటిలోనూ 43 శాతం ఖరీదైన ఇళ్లే ఉన్నాయి. కోటిన్నర రూపాయలపైన ఉన్నవే కావడం ఇక్కడి మార్కెట్‌ను తెలియజేస్తోంది.
• దిల్లీ రాజధాని ప్రాంతం యూనిట్ల సంఖ్య 52 శాతం పెరిగినా 8460 యూనిట్లకు మించలేదు. ఇక్కడి మార్కెట్‌ పెద్దగా ఆశాజనకంగా లేదు.
• చెన్నైలో 5040 ఇళ్లు కొత్తగా ప్రారంభించారు. గతంతో పోలిస్తే 71 శాతం పెరుగుదలతో మార్కెట్‌ గాడిలో పడుతోంది.
• కోల్‌కతాలో 2460 మాత్రమే నూతనంగా మొదలెట్టారు. ఇక్కడ సైతం క్రితం ఏడాదితో పోలిస్తే 22  శాతం పెరుగుదల నమోదైంది. రూ.40-80 లక్షల మధ్య ఇక్కడ ఇళ్లు అందుబాటులో ఉన్నాయి.
• ఏడింట ఐదు నగరాల్లో సానుకూల వృద్ధి నమోదు కాగా... మిగతా రెండు నగరాల్లో ప్రతికూలంగా ఉంది.
• బెంగళూరులో 11,440 యూనిట్లు కొత్తగా ప్రారంభించారు. ఇక్కడ 9 శాతం తగ్గాయి. రూ.40 లక్షల నుంచి రూ.1.5 కోటి లోపల ఉన్న ఇళ్లు ఇక్కడ అత్యధికంగా 68 శాతం ఉన్నాయి.