ఆవిరి మీద ఆకు రుచులు

భారతదేశం విభిన్న సంస్కృతుల సమ్మేళనం. అందుకే, ఆసేతు హిమాచలం...ఎన్నెన్నో ప్రత్యేకతలు చూస్తుంటాం. ముఖ్యంగా ఆ ప్రాంతాల్లోని వాతావరణం, వ్యవసాయం, ఆచార సంప్రదాయాలు, జీవనశైలికి అనుగుణంగా అక్కడి ప్రజల ఆహారపుటలవాట్లు ఉంటాయి. అలా ఈశాన్య రాష్ట్రాల్లో ఒకటైన త్రిపుర సిగ్నేచర్‌ రెసిపీ అవాన్‌ బంగ్వీ. కొత్త సంవత్సరమైన బిషు వేడుకల వేళ, ఇంటి శుభకార్యాలప్పుడూ దీన్ని తప్పనిసరిగా తయారు చేస్తారు. జిగట బియ్యం, బెల్లం, జీడిపప్పు, ఎండుద్రాక్ష, అల్లం, ఉల్లిపాయ, ఎండు ద్రాక్ష వంటి పదార్థాలతో ఈ అవాన్‌ బంగ్వీని వండుతారు. ఈ వంటకాన్ని అరటి ఆకులు లేదా బంగ్విని లైరు అని పిలిచే ఓ రకమైన పత్రాల్లో చుట్టి ఆవిరి మీద ఉడికిస్తారు. కమ్మగా, తీయగా ఉండే ఇది ఆరోగ్యానికీ ఎంతో బలమని అక్కడి వారు నమ్ముతారు.