జొన్నలతో మేలైన వంటకం

సింధీ వంటల్లో ‘జువర్‌ జో బథువా’ మహా రుచికరమైంది. తెల్లటి పిండి మీద సగ్గుబియ్యం, మిరియాలు వెదజల్లినట్లు ఎంత ఆకర్షణీయంగా కనిపిస్తుందో! చూస్తుంటేనే ఎప్పుడెప్పుడు తిందామా అనిపిస్తుందంటే అతిశయం కాదు. దీన్ని ఉదయానే ఫలహారంగా సేవిస్తారు.
సింధీ వాళ్ల మీద మొఘల్‌, పర్షియన్‌, అరబిక్‌ ఆచారాల ప్రభావం ఎక్కువగా కనిపిస్తుంది. వాళ్ల ఆహారం కూడా ఆయా సంస్కృతుల మిశ్రమంగా ఉంటుంది. ఆ రుచులు, సుగంధాలు తమదైన ప్రత్యేకతను చాటుతూ అలరిస్తాయి. ఇంతకీ ‘జువర్‌ జో బథువా’ ఎలా తయారుచేస్తారంటే.. జొన్నపిండిని నీళ్లతో కలిపి సన్న సెగమీద చక్కగా ఉడికిస్తారు. పూర్తిగా ఉడికిందనుకున్నాక యాలకుల పొడి వేస్తారు. తర్వాత తీపి తినేవాళ్లు బెల్లం లేదా పంచదార, కారం ఇష్టపడేవాళ్లు మిరియాల పొడి వేస్తారు. సులువుగా పూర్తయ్యే ఈ వంటకం రుచీ, ఆరోగ్యం కూడా.