వెదురు మొలకల కూర

అరుణాచల్‌ ప్రదేశ్‌ వాసులు ఇష్టంగా తినే ఆహారంలో వెదురు మొలకల కూర ఒకటి. దీని తయారీ పెద్ద కష్టమేం కాదు. లేత వెదురు మొక్కలను చిన్నగా తరిగి, ఒక రోజంతా నీళ్లలోనే ఉంచాలి. అలా నానబెట్టిన వెదురు ముక్కలను మర్నాడు కుక్కర్‌లో ఉడికించి మూడు విజిల్స్‌ వచ్చాక దింపేయాలి. జార్‌లో కొబ్బరి ముక్కలు, లవంగాలు, ఇలాచి, దాల్చినచెక్క, కొన్ని మిరియాలు, చారెడు వేయించిన ధనియాలు, పసుపు, మిర్చి వేసి గ్రైండ్‌ చేసుకోవాలి. నూనెలో ఆవాలు, కరివేపాకు వేగాక ఉల్లిపాయ ముక్కలు, సగానికి చీల్చిన పచ్చిమిర్చి, వెల్లుల్లి వేసి దోరగా వేగనివ్వాలి. అందులో గ్రైండ్‌ చేసిన మిశ్రమం వేసి రెండు నిమిషాలు ఉడికించాలి. తర్వాత వెదురు ముక్కలు వేసి అరగ్లాసు నీళ్లు పోసి, ఐదు నిమిషాలు ఉడికించాలి. కూర దగ్గర పడిన తర్వాత ఉప్పు వేసి దించేయాలి. రోటీ, చపాతీల్లో దీన్ని మక్కువగా తింటారు. ఈ వంటకాన్ని శాకాహారులు టొమాటోలు, క్యారెట్లు చేర్చి వండితే, మాంసాహారులు చికెను, మటను జోడిస్తారు.