ధర చూస్తారా..నాణ్యత చూస్తారా..

మనలో చాలామందిమి కూరల్లో గ్రేవీ కోసం టొమాటోలు ఉపయోగిస్తాం. ఈమధ్య వాటి ధర కొండెక్కడంతో కాస్త తగ్గించాం అనుకోండి. ఈ నేపథ్యంలో గుజరాత్‌ రాష్ట్రం సూరత్‌లో ఓ జంట మిర్చి బజ్జీలు, అరటి బజ్జీలకు భిన్నంగా టొమాటో బజ్జీలతో ఆహార ప్రియులను ఆకట్టుకుంది. ఒకరు టొమాటోలను గుండ్రంగా, సన్నగా తరిగి, వాటి మీద కొత్తిమీర పచ్చడి వేసి శనగపిండిలో ముంచి వేయిస్తుంటే.. రెండోవారు ప్లేటుల్లో అందిస్తున్నారు. వాటికి ఎంత గిరాకీ వచ్చిందంటే ఎంత ఖరీదైనా ఎవరూ వెనకాడటంలేదు. రోజుకు 200 కిలోలకు పైగా అమ్ముడై పోవడమే కాదు.. ధర ఎక్కువైతేనేం.. రుచి అమోఘం- అంటూ ప్రశంసలూ కురిపిస్తున్నారు. అమర్‌ సిరోహి అనే ఫుడ్‌ వ్లాగర్‌ తన ఇన్‌స్టాగ్రామ్‌లో పోస్ట్‌ చేసిన ఈ వీడియో లక్షల వీక్షణాలతో వైరల్‌ అయ్యింది. సరదా కామెంట్లతో నవ్వులు విరబూస్తున్నాయి.