ముల్లంగి తింటున్నారా..

వర్షాకాలం దొరికే దుంపకూరల్లో ముల్లంగి ఒకటి. కొంచెం వెగటుగా ఉండే మాట నిజమే. అయితేనేం.. ఇందులో పొటాషియం, పీచు, జింక్‌, భాస్వరం, మెగ్నీషియం, కాపర్‌, క్యాల్షియం, ఐరన్‌, మాంగనీస్‌, ఎ, బి6, సి, ఇ, కె విటమిన్లు విస్తారంగా ఉన్నాయి. ఇంత మంచి పోషకాహారం కనుకనే చాలామంది తమ ఆహారంలో చేర్చుకుంటారు. కూర, చారు, పచ్చడి, సలాడ్‌.. ఇలా ముల్లంగితో ఏదైనా చేసుకోవచ్చు. ముల్లంగితో కంటిచూపు మెరుగవుతుంది. ఎముకలు, దంతాలు దృఢంగా ఉంటాయి. ఇది గుండెను కవచంలా కాపాడుతుంది. ఎర్ర రక్తకణాలను వృద్ధి చేస్తుంది. రక్తానికి ఆక్సిజన్‌ అందించడంలో, బీపీని అదుపు చేయడంలో ఉపయోగపడుతుంది. ఒంట్లో చేరిన మలినాలను తొలగిస్తుంది. జీర్ణప్రక్రియ బాగుంటుంది. మధుమేహం నుంచి ఉపశమనం కలిగిస్తుంది. కాలేయం, మూత్రపిండాల్లో అపసవ్యతలను తొలగిస్తుంది. రోగనిరోధక శక్తిని పెంచుతుంది. ముఖం ముడతలు పడకుండా కాపాడుతుంది. చర్మం నేవళంగా ఉండటం వల్ల వయసు కనిపించదు. శరీరాన్ని డీహైడ్రేషన్‌ బారిన పడనివ్వదు. ఎన్ని లాభాలో కదా! అందుకే ముల్లంగి దొరికే కాలంలో తరచూ తినమంటారు ఆరోగ్య నిపుణులు. తిందామా మరి!