వేసవిలో.. చల్లదనాన్నిస్తాయి!

వేసవికాలం వస్తుందంటే వేడి దెబ్బని తట్టుకోవడానికి సబ్జా గింజలు ఎక్కడున్నాయా అని వెతుకుతాం. అనేక సమస్యల నుంచి ఉపశమనం కలిగించే ఈ గింజలు ఎలాంటి పోషకాలని కలిగిఉన్నాయో చూద్దాం..

* ప్రొటీన్లు, మంచి కొవ్వులకు ఈ సబ్జాగింజలు పెట్టింది పేరు. పీచు, ఒమెగా 3 ఫ్యాటీ ఆమ్లాలుండే ఈ గింజలని తీసుకుంటే.. ఎండ తాకిడి నుంచి బ్రహ్మాండమైన ఉపశమనం కలిగిస్తాయి.

* పీచు ఎక్కువగా ఉండే ఈ గింజలు మధుమేహం ఉన్నవారికి ఒక్క సారిగా చక్కెరస్థాయిలు పెరగకుండా చేసి నిదానంగా జీర్ణమవుతాయి. మలబద్ధకం వంటి సమస్యలతో బాధపడేవారు ఈ గింజలని రోజూ తీసుకుంటే మంచిది.

* ఈ గింజల్ని తిన్నప్పుడు కడుపు నిండిన భావన కలుగుతుంది. దాంతో ఇంకేవో చిరుతిళ్లు తినాలనే భావన ఉండదు. దానివల్ల బరువు అదుపులో ఉంటుంది.  

* సబ్జా గింజలతో చేసిన స్మూథీలు తాగడం వల్ల రక్తహీనతను నివారించొచ్చు. కారణం ఐరన్‌, క్యాల్షియం, మెగ్నీషియం మెండుగా ఉంటాయి. ఎముకలు బలంగా మారతాయి.

* ఈ గింజల్లో యాంటీ బ్యాక్టీరియల్‌, యాంటీ వైరల్‌, యాంటీ ఫంగల్‌ గుణాలు అధికం. నోటిలో పుళ్లు, అల్సర్లు ఉన్నవారికి ఇది మంచి మందు. నోటి దుర్వాసనని తగ్గిస్తాయి. దంతక్షయాన్ని నివారిస్తాయి. క్యాన్సర్‌ని నివారించే గుణాలూ అధికమే.

* అధిక కొలెస్ట్రాల్‌తో బాధపడేవారు... సబ్జాగింజలతో చేసిన జావ, స్మూథీలు తాగితే ఫలితం ఉంటుంది.

* అయితే ఈ గింజలని రోజుకి రెండు చెంచాలకి మించి తినడం మంచిదికాదు. వికారం, వాంతులు, ముఖంపై మొటిమలు, యాక్నె వంటి సమస్యలు వచ్చే అవకాశం ఉంది. గర్భిణులు వైద్యుల సలహామేరకే తీసుకోవాల్సి ఉంటుంది.