మైలేజీ పెరిగేలా..

యువాహనం

చేతిలో బండి ఉంటే కుర్రకారుకి కాలు నిలవదు. షికార్లు, టూర్లు అంటూ తిరుగుతూనే ఉంటారు. అసలే ఇంధనం ధరలు మండిపోతున్న కాలం. మరి మంచి మైలేజీ రావాలంటే ఏం చేయాలి?

* గేర్‌ వేయగానే యాక్సిలరేటర్‌ ఒక్కసారిగా తిప్పేస్తుంటారు కొందరు. దీంతో త్రోటల్‌, ఇంజిన్‌ అధిక ఇంధనాన్ని పీల్చేస్తుంటాయి. అలా కాకుండా బండి కదిలిన కాసేపటికి నెమ్మదిగా యాక్సిలరేటర్‌ని పెంచాలి.

* కారణాలేమైనా చాలామంది బండి ఇంజిన్‌ని ఆన్‌ చేసి నిమిషాల పాటు అలాగే ఉంచుతారు. దీంతో పెట్రోల్‌ అత్యధికంగా వినియోగమవుతుంది. ప్రస్తుతం అన్ని వాహనాల్లో ఆటోమేటిక్‌ సదుపాయం ఉండటంతో బండిని ఐడ్లింగ్‌లో ఉంచకుండా అవసరం ఉన్నప్పుడే ఆన్‌ చేసుకోవచ్చు.

* టైర్లలో గాలి తక్కువైతే బండి ముందుకు కదలదు. ఎక్కువైతే కుదుపులుంటాయి. ఇంతేకాదు.. ఇది ఇంధన వినియోగం మీదా ప్రభావం చూపిస్తుంది. పదిహేను  రోజులకోసారైనా టైర్లలో గాలి తగినంతగా ఉందా? లేదా? అని  చూసుకోవాలి.

* లో గేర్లలో ద్విచక్రవాహనం నడిపినప్పుడు ఇంధన వినియోగం ఎక్కువ. సాధ్యమైనంత ఎక్కువగా టాప్‌గేర్‌లో నడపడానికే ప్రయత్నించాలి.

సమయానుకూలంగా బండిని సర్వీసింగ్‌ చేయిస్తుంటే ఇంజిన్‌ సహా అన్ని కీలకమైన భాగాలు బాగా పని చేస్తాయి. మైలేజీ పెరుగుతుంది. బైక్‌ ఎక్కువ కాలం మన్నికగా ఉంటుంది.