వర్క్‌ ఫ్రం హోం.. తీరు మార్చేద్దాం

కరోనా మిగిల్చిన చేదు జ్ఞాపకాలు చాలానే. దాంతోపాటు వర్క్‌ ఫ్రం హోం అనే ట్రెండ్‌ని పరుగులు పెట్టించిందీ ఆ మహమ్మారే. కొవిడ్‌ మనల్ని వదిలినా.. ఇప్పటికీ కొన్ని కార్యాలయాలు ఉద్యోగులతో ఇంటి నుంచి పనినే కొనసాగిస్తున్నాయి. ఎప్పుడూ ఇంట్లోంచే అంటే బోర్‌గా ఫీలయ్యేవారు కొత్తగా ఇలా ప్రయత్నించి చూస్తే పోలా...

కాఫీషాప్‌లు: ఇంట్లో నాలుగు గోడల మధ్య ఉండి పని చేయాలంటే ఎవరికైనా బోరే. అందుకే ల్యాపీ పట్టుకొని అలా కెఫేకో, కాఫీషాప్‌కో వెళ్లండి. కళ్లకింపుగా చాలామంది కనిపిస్తారు. కొన్నిచోట్ల ఉచితంగా వై-ఫై సౌకర్యం ఉంటుంది. కాఫీ సిప్‌ చేస్తూ.. స్నాక్స్‌ నములుతూ.. పని చేస్తుంటే.. ఆ మజానే వేరు.

స్నేహితుడి గది: అసలు ఫ్రెండ్‌ పక్కనుంటేనే చెప్పలేనంత హాయి. తన ఇంట్లో ఉండి పని చేస్తుంటే ఇంకెంత బాగుంటుందో. అక్కడ ఏ ఆంక్షలు లేకుండా స్వేచ్ఛగా ఉండొచ్చు. అప్పుడప్పుడు సరదాగా కబుర్లు చెప్పుకోవచ్చు.సందేహాలు తీర్చుకోవచ్చు. ఓమాటలో చెప్పాలంటే ఎంచక్కా కాలేజీ రోజుల్లోకి వెళ్లిపోవచ్చు.

గ్రంథాలయం: అలికిడి, హడావుడి కాకుండా చుట్టూ ప్రశాంతమైన వాతావరణం ఉండాలని కోరుకునే ఉద్యోగులూ ఉంటారండోయ్‌. అలాంటివారికి గ్రంథాలయాలు అనువైన ప్రదేశాలు. అక్కడ ఏదో ఒక మూలన కూర్చొని ల్యాప్‌టాప్‌ తెరిస్తే.. మిమ్మల్ని అడిగేవారు ఎవరుంటారు?

కోవర్కింగ్‌ స్పేస్‌: చాలా నగరాల్లో కో-వర్కింగ్‌ ప్రాంతాలు పెరిగిపోతున్నాయి. ఇదొక తాత్కాలిక కార్యాలయంలాంటిది. ఇంటినుంచి పని చేసే కొంతమంది ఉద్యోగులు కలిస్తే.. ఎంచక్కా అక్కడ ఓ స్పేస్‌ని బుక్‌ చేసుకోవచ్చు. డెస్క్‌లు, ప్రింటర్లు, సమావేశ గదులు.. వీటన్నింటినీ చూస్తుంటే అచ్చంగా ఆఫీసులో ఉన్న అనుభూతే కలుగుతుంది.

అందరికీ దూరంగా: సముద్రం ఒడ్డునో.. ప్రకృతి ఒడిలోనో.. ఏ హోటల్‌ గదిలోనో ఉండటం కొందరికి బాగా నచ్చుతుంది. అక్కడే హాయిగా ఆడుతుపాడుతూ హాయిగా పని చేసుకునే వర్క్‌ ఫ్రం డెస్టినేషన్‌ ధోరణి పెరుగుతోంది. వీలైతే మీరూ అందులో చేరిపోవచ్చు.