ఇంట్రావర్ట్‌, ఎక్స్‌ట్రావర్ట్‌.. అయిపోదాం యాంబీవర్ట్‌

పదిమందిలో ఉన్నా అంటీముట్టనట్టుగా ఉండేది.. ఇంట్రావర్ట్‌! ఒంటరిగా ఉన్నా తనచుట్టూ నలుగురు పోగయ్యేలా చేసేవాడు.. ఎక్స్‌ట్రావర్ట్‌! ఈ ఇద్దరూ కాకుండా మరొకరూ ఉన్నారండోయ్‌.. తనే ‘యాంబీవర్ట్‌’... జనరేషన్‌ జడ్‌ కాలంలో ఈ మనస్తత్వమే యువతకి సక్సెస్‌ మంత్ర అన్నది పెద్దల మనోగతం.

మనకి ఇంట్రావర్ట్‌లు తెలుసు. ఎక్స్‌ట్రావర్ట్‌లూ తెలుసు. కొత్తగా ఈ యాంబీవర్ట్‌ ఎవరంటారా? ఆ ఇద్దరిలోని లక్షణాలను ఒంట పట్టించుకున్న వాడు. అంతర్ముఖుడిలా మూతి ముడుచుకొని ఉండటం.. సమయం వచ్చినప్పుడు బహిర్ముఖుడిలా చెలరేగిపోవడం తన స్టైల్‌. ఇంకొన్ని లక్షణాల విషయానికొస్తే..
* ఎక్స్‌ట్రావర్ట్‌లు అలుపే లేకుండా మాట్లాడతారు. ఇంట్రావర్ట్‌లు పలకరిస్తేగానీ మాట కలపరు. యాంబీవర్ట్‌లు ఎదుటివాళ్లు చెప్పింది బాగా వింటారు. సందర్భం వచ్చినప్పుడు ఎదుటివాళ్లను మెప్పించేలా మాట్లాడతారు.
* అన్నీచోట్లా ఒకటే మంత్రం పని చేయదు. పని జరగాలంటే కొందరితో ఎక్కువ మాట్లాడాలి. ఇంకొందరు చెప్పేది సావధానంగా వినాలి. సమయానుకూలంగా ఆ రెండూ యాంబీవర్ట్‌లు చేయగలరు.
* వీళ్లు నలుగురిని కూడగట్టడంలో ముందుంటారు. అవసరమైతే తనకు అప్పగించిన పనుల్ని ఒక్కరే సొంతంగా చేయగలరు. ఈ గుణం ఔత్సాహిక పారిశ్రామికవేత్తలుగా రాణించేందుకు దోహద పడుతుంది.
* అంతర్ముఖులకు నలుగురిలో కలవాలంటే చిరాకు. బహిర్ముఖులకు ఒంటరితనం అంటే భయం. ఈ రెండింటినీ ఎంజాయ్‌ చేసే మనస్తత్వం మన యాంబీవర్ట్‌లది.
* మార్కెటింగ్‌, బోధన, సమష్టిగా పని చేసే రంగాలు, నాయకత్వ చొరవ అవసరం అయ్యే ఉద్యోగాల్లో యాంబీవర్ట్‌లు అత్యధికంగా రాణించే అవకాశం ఉంటుంది.
* వీళ్లు నేర్చుకునేందుకు బాగా ఇష్టపడతారు. అవసరం ఉంటే చొరవ ప్రదర్శిస్తారు. అనవసర విషయాల్లో తలదూర్చరు.
* బహిర్ముఖులు ఇతరులను తేలికగా నమ్మేస్తారు. ఎవరితోనైనా తొందరగా స్నేహం చేస్తారు. అంతర్ముఖులు ఒకరితో స్నేహం చేయాలంటే చాలా సమయం పడుతుంది. యాంబీవర్ట్‌లు ఎదుటివాళ్ల మనస్తత్వానికి అనుగుణంగా వాళ్లతో దూరంగా ఉండటం లేదా కలిసిపోవడం చేస్తారు.