బురదలో సరదాలాట!

గోవా అనగానే మనకు బీచ్‌లు గుర్తొస్తాయి. షార్ట్‌లు వేసుకొని సరదాగా తీరం వెంట నడిచే జంటలు కనువిందు చేస్తాయి. వాటితోపాటు ఈ సీజన్‌లో ‘చిక్కల్‌ కాలో’ సందడి ఎక్కువే ఉంటుంది. అసలేంటిది అంటే.. బురదలో సరదాలాట. సంప్రదాయం, సరదా మేళవించిన ఈ కేళిలో ముందుంటోంది యువతే.

గోవా సమీపంలోని మార్సెల్‌ అనే గ్రామంలో ఈ మడ్‌ ఫెస్టివల్‌ అప్పుడెప్పుడో మొదలైంది. నేల తల్లి, రైతులకు మధ్య ఉండే అనుబంధానికి గుర్తుగా ఆషాఢ మాసం మొదలైన పదకొండో రోజున.. ఏటా నిర్వహించడం ఆనవాయితీగా మారింది. మొదటిసారి దేవకీకృష్ణ ఆలయం పరిసరాల్లో ఈ ఆట ఏర్పాటు చేశారు. క్రమంగా ఇది చుట్టుపక్కల ప్రాంతాలకీ పాకిపోవడం.. యువత పెద్దఎత్తున ఇందులో పాల్గొనడంతో రాష్ట్రం అంతటా విస్తరించసాగింది. కొన్నేళ్ల నుంచి గోవా టూరిజం డిపార్ట్‌మెంట్‌ అధికారికంగా ఈ మడ్‌ ఫెస్టివల్‌ని నిర్వహిస్తోంది. సాధారణంగా ఈ సమయంలో వర్షాలు కురిసి ప్రాంతాలన్నీ బురదతో చిత్తడిగా మారుతుంటాయి. ఆట రంజుగా సాగడానికి ఇది కూడా ఓ కారణమే. ఇందులో ఆడా, మగా అనే తేడాలేం లేకుండా.. యువత ఆ బురదలో దిగి ఒకర్నొకరు తోసుకోవడం.. కబడ్డీలాంటి ఆటలాడటం చేస్తుంటారు. ఈ వేడుకల్ని చూడటానికి జనం పెద్ద ఎత్తున ఎగబడుతున్నారు. కొందరు విదేశీయులు సైతం ప్రత్యేకంగా ఈ వేడుక కోసమే వస్తున్నారు. భక్తి, సరదా రెండూ కలిసిన ఈ సంబరాలు పెద్ద ఎత్తున జరుగుతున్నాయి. ఆసక్తి ఉన్న కుర్రకారు అక్కడ వాలిపోవచ్చు.

సందర్భం