ఉపవాసంలో వ్యాయామం ?

బరువు తగ్గాలనో.. భక్తి కోసమో.. ఆరోగ్యానికి మంచిదనో.. కారణం ఏదైనా నిత్యం వ్యాయామం చేసే కుర్రకారులో ఉపవాసం ఉండే వాళ్లుంటారు. ఈ సమయంలో వాళ్లేం జాగ్రత్తలు తీసుకోవాలంటే...

* ఉపవాసంలో ఉన్నప్పుడు తేలికపాటి వ్యాయామాలే ఉత్తమం. శరీరానికి తగినన్ని కార్బోహైడ్రేట్లు అందవు. శక్తి సన్నగిల్లుతుంది. బరువులు ఎత్తే ఓపిక ఉండదు.
* ఆహారం తీసుకోకపోయినా.. పంతంకొద్దీ హైఇంటెన్సిటీ వ్యాయామాలు చేస్తే కండరాల క్షీణత ప్రమాదం ఉందంటారు నిపుణులు.
* తక్కువ శ్రమతో ఎక్కువ ప్రయోజనం కలిగించేవి రిస్టోరేటివ్‌ యోగాసనాలు. నేలపై పడుకోవడం లాంటి ఈ కసరత్తులు హార్మోన్ల సమతుల్యతనూ కాపాడతాయి. ఈ సమయంలో వీటిని ఆచరించడం ఉత్తమం.
* ఫాస్టింగ్‌లో ఉన్నప్పుడు ఎక్కువ బరువులెత్తే, వేగంగా పరుగెత్తే వ్యాయామాలు చేయొద్దు. మంచినీళ్లు సైతం ముట్టుకోని కఠిన ఉపవాసం అయితే అసలు వ్యాయామం జోలికే వెళ్లకపోవడమే మంచిదంటారు.
* బరువు పెరగడానికి కూడా కొందరు వర్కవుట్లు చేస్తుంటారు. దానికోసం వర్కవుట్‌కి ముందే కొన్నిరకాల ఆహారం తీసుకోవాల్సి ఉంటుంది. ఉపవాసం ఉండేవాళ్లు బరువు పెరిగే వ్యాయామాలు అసలే చేయొద్దు.
* పాక్షిక ఉపవాసం, తక్కువ కేలరీల ఆహారం తీసుకునేవారు కార్డియోలాంటి కసరత్తులు చేయొచ్చు. పూర్తిగా అసలేం తినకుండా ఉంటే.. తేలికైన నడక, జెంటిల్‌ పైలేట్స్‌.. సరిపోతుంది.