చుక్కలూ చూస్తావా?

కరోనా తర్వాత విద్యాసంస్థలు తెరిచిన సమయం అది. మా ఎంబీఏ కళాశాలలో హాజరు కోసం బయోమెట్రిక్‌ పద్ధతి పెట్టారు. లోపలికి రాగానే విద్యార్థులంతా ఫేస్‌ రికగ్నిషన్‌ యంత్రం ముందు వరుసలో వచ్చి నిల్చొనేవారు. మా క్లాస్‌మేట్‌ శ్రద్ధ అంటే నాకు చాలా ఇష్టం. చాలారోజులుగా తనతో మాట కలపడానికి ప్రయత్నిస్తున్నా. ఓరోజు వరుసలో తన వెనకాలే వచ్చి నిల్చున్నా. ఈసారి ఎలాగైనా తనతో మాట్లాడాలని ధైర్యం కూడ దీసుకుంటున్నా. తనవంతు రాగానే యంత్రం మొరాయించింది. తను చిరాకుగా మాస్క్‌ తీసేసి ‘ఈ కొత్త పద్ధతేంటో.. పాతదే ఉంటే సరిపోయేదిగా’ అని పైకే అనేసింది. నేను వెంటనే ‘చందమామలాంటి నీ అందమైన మొహం అందరికీ కనబడాలిగా.. అందుకే’ అని ధైర్యంగా అనేశా. తన రియాక్షన్‌ కోసం చూస్తుంటే.. ‘చందమామే కాదు.. చుక్కలు కూడా చూపిస్తానురా’ అంటూ వెనకాలే నిల్చున్న మా లెక్చరర్‌ నా నెత్తిపై ఒక్కటిచ్చారు. శ్రద్ధ నవ్వు ఆపుకుంటుంటే.. నేను నోర్మూసుకొని గబగబా అక్కడ్నుంచి
వెళ్లిపోయాను.

ఎస్‌. ప్రవీణ్‌, ఇబ్రహీంపట్నం