కొత్త జాయింట్‌ కనుగొన్నా..!

నా ఎంబీబీఎస్‌ మొదటి సంవత్సరంలో జరిగిందీ సరదా సంఘటన. ఓరోజు అనాటమీ సర్‌ పాఠం చెబుతున్నారు. బాగా బోర్‌గా ఉండటంతో.. నాకు నిద్ర పట్టేసింది.  కాసేపటికి సర్‌ నన్ను గమనించి క్లాస్‌ చెప్పడం ఆపేశారు. దాంతో నా క్లాస్‌మేట్స్‌ అంతా నవ్వడం మొదలు పెట్టారు. నాకు మెలకువ వచ్చి కళ్లు తెరిచాను. సర్‌ నా దగ్గరికొచ్చి ‘ఏంటి నాన్నా నిద్ర పోతున్నావా?’ అన్నారు. ‘లేదు సర్‌.. కళ్లు మూసుకొని పాఠం వింటున్నా’ అంటూ కవర్‌ చేసుకోవడానికి ప్రయత్నించా. ‘ఓహో.. అలాగా’ అంటూ పాఠంలోని రెండు ప్రశ్నలడిగారు. నా దగ్గర సమాధానం లేదు. ‘పోనీ ఏం సబ్జెక్టు గురించి చెబుతున్నానో తెలుసా?’ అన్నారు. నేను ‘థైరోమండిబ్యులర్‌ జాయింట్‌’ అన్నాను గట్టిగా. ‘చూశారా.. బాబు మనిషిలో కొత్త రకం జాయింట్‌ కనిపెట్టాడు. ఇతడు డాక్టర్‌ కాదు సైంటిస్ట్‌ అవుతాడు’ అనడంతో తరగతి మొత్తం బిగ్గరగా ఒకటే నవ్వులు. టెంపరో మండిబ్యులర్‌ జాయింట్‌ (టీఎంజే)కి బదులుగా.. కంగారులో నేను అలా చెప్పానని తర్వాత అర్థమైంది.
సీహెచ్‌ శ్రీకర్‌రెడ్డి, నంద్యాల