ఇదేమైనా చేపల మార్కెట్టా?

కాలేజీ కహానీలు

నేను ఇంటర్‌లో ఉన్నప్పుడు జరిగిందిది. మా మ్యాథ్స్‌ లెక్చరర్‌ చాలా సౌమ్యుడు. ఎవరినీ పల్లెత్తు మాట అనరు. ఆయన రాగానే క్లాసంతా గోలగోలగా మారేది. ఎవరికి నచ్చినట్టు వాళ్లుండేవాళ్లు. ఆరోజు కూడా ఆయన పాఠం మొదలు పెట్టగానే ఎప్పట్లాగే అల్లరి మొదలైంది. క్లాస్‌ శ్రద్ధగా వినాలనుకున్నా మా క్లాస్‌మేట్స్‌ గోలతో ఆ ప్రయత్నం విరమించుకున్నా. కాసేపయ్యాక అప్పట్లో బాగా ఫేమస్‌ అయిన ‘యే మేరా జహా.. యే మేరా ఘర్‌ మేరా ఆషియా..’ అనే పాట హమ్‌ చేయసాగా. నా ఫ్రెండ్స్‌ కూడా గట్టిగా గొంతు కలపడంతో సర్‌కి వినపడింది. ఎప్పుడూ లేనిది మాపై తిట్ల దండకం మొదలు పెట్టారు. ఆయనకి అది కొత్త కావడంతో.. తడబడసాగారు. దాంతో మాకు నవ్వాగలేదు. మా నవ్వు చూసి సర్‌ మరింత రెచ్చిపోయి ‘వెనక బెంచీలో కూర్చొని పాడటం కాదురా. ధైర్యముంటే స్టేజీ ఎక్కి పాడాలి’ అన్నారు. మేం వెంటనే బ్లాక్‌బోర్డు దగ్గరికెళ్లి నిల్చొని పాడసాగాం. మెల్లగా వేరేవాళ్లూ జతయ్యారు. ఇంక ఆయన కోపం పట్టలేక.. ‘వెళ్లండి వెధవల్లారా.. ఇది క్లాస్‌ అనుకున్నారా చేపల మార్కెటా?’ అని గట్టిగా అరవడంతో అందరం గప్‌చుప్‌గా ఎవరి సీట్లలో వాళ్లం వచ్చి కూర్చున్నాం. అప్పుడే బెల్‌ మోగింది. ఆయనటు వెళ్లిపోగానే.. క్లాసంతా పడీపడీ నవ్వాం.

అరుణ్‌ ఆర్‌, ఈమెయిల్‌