మీ ప్రేమ భాషేంటి?

ఆలుమగలైనా.. పడుచు ప్రేమికులైనా.. ఒకరిపై ఒకరికి ఉన్న ఇష్టాన్ని ఒక్కోరకంగా వ్యక్తపరుస్తుంటారు. మొత్తానికి ఈ వ్యక్తీకరణఐదు రకాలుగా ఉంటుందం టున్నారు లవ్‌గురూలు. ఇదిగో ఇలా..

• మాటలు మధురం: గుండెలో గూడుకట్టుకున్న ప్రేమను అవతలివాళ్లకు వ్యక్తం చేయడానికి అత్యధికులు ఆచరించే మార్గం ప్రేమ గాఢతను మాటల్లో చెప్పడమేనట. ‘ఐలవ్యూ’, ‘నువ్వు అందంగా ఉన్నావు’, ‘నువ్వు నాకు దొరకడం ఎంతో లక్కీ’.. ఇలాంటివి ప్రేమ ఆయుష్షును మరింత పెంచుతాయంటున్నారు.
•  విలువైన సమయం: మనసు పడ్డ వారికోసం సమయం కేటాయించడం కూడా ప్రేమను వ్యక్తపరచడంలో ఓ భాగమే. ఇద్దరూ కలిసి భోజనం చేయడం, సినిమాకి వెళ్లడం.. ఒకరి కోసం ఒకరు ఎదురుచూడటం.. ఆడుతుపాడుతూ పని చేయడం.. ఇవన్నీ ప్రేమకి సంకేతాలే.

•  చేతలతో చేరువ: మాటలే కాదు.. ఒకరికొకరు సాయం చేసుకోవడమూ అనుబంధాన్ని దృఢం చేసుకునే మార్గమే. అర్ధాంగి కోసం వంట చేసి పెట్టడం.. ప్రేమికుడికి ప్రాజెక్ట్‌వర్క్‌లో సాయపడటం.. షాపింగ్‌ చేయడం.. ఇలాంటివి ఎంతో ప్రేమ ఉంటేగానీ.. చేయరుగా!
•  బహుమతుల బంధం: నాలుగో ప్రేమ భాష మనసుకి నచ్చేవారు మెచ్చేలా బహుమతులు ఇవ్వడం. అవి మోముపై చిరునవ్వు కురిపించే చిరుకానుకలు కావొచ్చు.. జీవితాంతం గుర్తుంచుకునే విలువైన బహుమతులు అవ్వొచ్చు.. ఇలాంటివి భాగస్వాములను మెప్పిస్తూనే ఉంటాయట.
•  సన్నిహితాల స్పర్శ: ఇష్టమైనవాళ్లని స్పృశించడం, కౌగిలించుకోవడం, ముద్దు పెట్టుకోవడం, చేతులో చేయి వేయడం, రొమాన్స్‌... ఇవి సైతం ప్రేమను వెల్లడించే దారులే. ముఖ్యంగా యువ జంటలు మరింత దగ్గరయ్యేందుకు ఇది షార్ట్‌కట్‌లా పని చేస్తుందంటారు.