డయాగ్రామ్‌లు ఎక్కడ?

మా కెమిస్ట్రీ లెక్చరర్‌ చాలా స్ట్రిక్టు. ఓసారి మా ల్యాబ్‌ రికార్డులు పరిశీలిస్తున్నారు. అంతకుముందు పాఠం సరిగా అర్థం కాకపోవడంతో కొన్ని ఫార్ములాలు, డయాగ్రామ్‌లు సరిగా గీయలేకపోయాను. ‘సర్‌ అడిగితే చెప్పేదెలా..’ అని నాలో టెన్షన్‌ మొదలైంది. కాసేపు ఆలోచించాక నాకో ఉపాయం తట్టింది. ఆయన నా రికార్డులు పరిశీలిస్తున్నప్పుడు ధ్యాస మరల్చేలా ఏవో ప్రశ్నలడగాలనుకున్నా. నోట్‌బుక్‌ చూస్తున్నప్పుడు, అనుకున్నట్టుగానే ‘పరీక్షలు ఎప్పుడు మొదలవుతాయి సర్‌?’, ‘ప్రాక్టికల్‌కి ఎన్ని మార్కులు.. థియరీకి ఎన్ని?’ అంటూ ప్రశ్నలడుగుతూనే ఉన్నాను. ఆయన వాటికి సమాధానాలు చెబుతూ చూసీ చూడకుండా సంతకం చేసేశారు. ‘హమ్మయ్యా.. గండం గడిచిందనుకున్నా. కానీ నా వెనక బెంచీలో ఉండే రమేశ్‌ నన్ను ఇరికించాడు. ‘వాడి నోట్‌బుక్‌ చూసి ఇదేం పనిరా.. సగం సగం చేశావ్‌’ అంటూ వంగోబెట్టి వీపు మీద ఒక్కటిచ్చారు సర్‌. వాడు ఊరికే ఉండకుండా ‘శ్రీలేఖ నోట్‌బుక్‌ చూసే నేనూ రాశాను. తనది తప్పు కానప్పుడు నాదెలా అవుతుంది’ అన్నాడు రోషంగా. దాంతో సర్‌.. మరోసారి నా రికార్డులు పరిశీలించడంతో దొరికిపోయా. ఆయన గట్టిగా చీవాట్లు పెడుతుంటే క్లాసంతా నవ్వుల గోల.            

ఆర్‌.శ్రీలేఖ, కాకినాడ