Updated : 09 Jul 2022 07:03 IST

మనసంతా ఆంటీనే!

మనలో మనం

నేను ఇంజినీరింగ్‌ ఫైనలియర్‌. మొన్నటిదాకా చదువులో మెరిట్‌ విద్యార్థిని. మూడు నెలల కిందట మా పై పోర్షన్‌లో ఒక కుటుంబం అద్దెకు దిగింది. క్యాంప్‌లు అంటూ అంకుల్‌ ఎప్పుడూ ఊర్లు తిరుగుతుంటారు. ఆంటీ ప్రతి చిన్న అవసరానికీ నన్ను పిలుస్తుంది. సరుకులు తీసుకురమ్మంటుంది. చిరుతిళ్లు పెడుతూ అభిమానం చూపిస్తుంది. ఆమె అభిమానంలో ఎలాంటి కల్మషం లేదనిపిస్తోంది. కానీ ఆమె నన్ను తాకినప్పుడు నా నరాలు జివ్వున లాగుతున్నాయి. చెడు ఆలోచనలు వస్తున్నాయి. ఆమెతో రొమాన్స్‌ చేస్తున్నట్టు వస్తున్న కలల్ని అదుపు చేసుకోలేకపోతున్నా. చదువుపై ధ్యాస తగ్గుతోంది. నేనేం చేయాలి?

- బీఎస్‌కే, ఈమెయిల్‌

మీ సమస్యని మా దృష్టికి తీసుకొచ్చినందుకు అభినందనలు. టీనేజీలో ఇలాంటి కోరికలు సహజమే.. కానీ ఈ వయసులోనే కోరికలని నియంత్రించుకునే నిగ్రహ శక్తి ఉండాలి. మనసు చెప్పినట్టు మీరు వినకూడదు. మీరు చెప్పినట్టే మనసు వినేలా నియంత్రించుకోవాలి. చెడు ఆలోచనలు ఎప్పటికీ ప్రమాదకరమే. ఒకవేళ మీ ఇద్దరి మధ్య ఏదైనా అనైతిక సంబంధం ఏర్పడితే ఆమె జీవితానికి కూడా ముప్పే. అక్రమ సంబంధాల కారణంగా హత్యలు చేయడం, హత్యకు గురి కావడంలాంటి ఎన్నో సంఘటనలు చూస్తూనే ఉన్నాం. ఆమెలో ఎలాంటి కల్మషం లేదని మీరే చెప్పారు. కాబట్టి మీ ఆలోచనా విధానం మార్చుకుంటే మంచి భవిష్యత్తు ఉంటుంది. ఆమె మీతో చనువుగా ఉంటోంది అంటే తనని ఒక అక్కలా భావించుకోండి. ఆమె ఒంటరిగా ఉన్నప్పుడు కాకుండా ఆమె భర్త ఉన్నప్పుడే వాళ్లింటికి వెళ్లండి. ప్రస్తుతం మీరు చదువు, కెరీర్, లక్ష్యాలు, ఆర్ధికంగా ఎలా ఎదగాలి అనే విషయాలపైనే దృష్టి పెట్టాలి. బంధాలు.. అనుబంధాల పట్ల గౌరవం, నైతిక విలువలు పాటించే వారినే సమాజం గౌరవిస్తుందనే విషయం మర్చిపోవద్దు. మీకు అశ్లీల చిత్రాలు చూసే అలవాటు ఏమైనా ఉంటే మానుకోండి. ఒక్కసారి మంచీచెడుల గురించి బాగా ఆలోచిస్తే.. తప్పేంటో, ఒప్పేంటో మీ అంతరాత్మ చెబుతుంది. కాలేజీ పరీక్షల్లో ఫెయిలైతే.. మరోసారి రాసి పాస్‌ కావొచ్చు. జీవితం అనే పరీక్షలో ఒక్కసారి వైఫల్యం చెందితే బతికి ఉన్నంతకాలం బాధ పడాల్సి ఉంటుంది.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని

సుఖీభవ

మరిన్ని