April Fools Pranks: ప్రాంక్‌ చేస్తే..పడీపడీ నవ్వాల్సిందే!

ఈరోజేంటి? ఏప్రిల్‌ 1. ఫూల్స్‌ డే అని కూడా అంటుంటాం. నేడు మన దగ్గరి వాళ్లను సరదాగా ఫూల్‌ని చేస్తే ఎవరూ ఏమీ అనుకోరు కదా! మరెందుకాలస్యం.. సహోద్యోగులు, స్నేహితులు, కుటుంబ సభ్యులు, సన్నిహితులతో ఈ ప్రాంక్స్‌ ప్రయత్నించి సరదాగా నవ్వుకోండి..

* పిల్లలో, స్నేహితులో కూర్చునే చోట సడెన్‌గా ఒక బెలూన్‌ పెట్టండి. అది పగిలినప్పుడు సరదాగా అందరూ నవ్వుకోవచ్చు.
* పిల్లో కవర్‌ తీసుకొని దిండుకి బదులు అందులో సరిగ్గా బెలూన్స్‌ అమర్చండి. దాన్ని ఉపయోగించేవారు పడే ఇబ్బందిని చూస్తే నవ్వు రాకుండా ఉంటుందా?
* ఇంట్లో ఎవరూ నిద్ర లేవకముందే. క్యాలెండర్‌, ఫోన్లలో తేదీలు మార్చండి. సమయం మార్చేయండి. పిల్లల్ని ముందే నిద్ర లేపి స్కూల్‌కి టైమ్‌ అయిందని ఫూల్‌ని చేయండి.
* డెస్కుల్లో ఉన్న వస్తువులన్నీ ఖాళీ చేసి ఓ చోట దాచండి. అవి ఏమయ్యాయో తెలియక హైరానా పడుతుంటే.. నవ్వుతూ ఒక్కొక్కటీ తీసి అందివ్వండి.
* టీవీ రిమోట్‌ తీసుకుని దాంట్లో బ్యాటరీలు తిరగేసి వేయడమో, సెన్సర్‌కి టేప్‌ అతికించడమో చేయండి. ఏమైందో అని వాళ్లు గాబరా పడుతుంటే నవ్వులే నవ్వులు.
* కాగితాల్ని చిన్నచిన్న ముక్కలుగా కత్తిరించి ఫ్యాన్‌పైన జాగ్రత్తగా పెట్టండి. ఎవరైనా వచ్చి స్విచాన్‌ చేయగానే వారి పైన పడతాయి. వాళ్లు అయోమయంగా మొహం పెట్టినప్పుడు ఆటపట్టించండి.
* ఫ్రిజ్‌లో ఉన్న ప్రతి వస్తువుకి గూగ్లీ కళ్లని అతికించండి. ఎవరైనా ఆ ఫ్రిజ్‌ తెరిచినప్పుడు అన్నీ తమ వైపే చూస్తున్నట్టుగా అనిపిస్తుంది. ఈ ప్రాంక్‌ భలే సరదాగా ఉంటుంది.