Softbank:భారత్‌దే భవిష్యత్తు.. సాఫ్ట్‌బ్యాంక్‌ గ్రూప్‌ విశ్వాసం

దిల్లీ: ప్రముఖ మదుపరి, సాఫ్ట్‌బ్యాంక్‌ చీఫ్‌ మసయొషి సన్‌ భారత ఆర్థిక భవిష్యత్తుపై విశ్వాసం వ్యక్తం చేశారు. భారత్‌కు మెరుగైన భవిష్యత్తు ఉందని.. ఇక్కడి యువ ఔత్సాహిక పారిశ్రామికవేత్తలు బాగా రాణిస్తారని ఆశాభావం వ్యక్తం చేశారు. ఈ ఏడాదిలో ఇప్పటి వరకు భారత్‌లో మూడు బిలియన్ డాలర్లు పెట్టుబడిగా పెట్టినట్లు వెల్లడించారు. భారత్‌లో పుట్టుకొచ్చిన దాదాపు అన్ని యూనికార్న్‌లకు కనీసం 10శాతం నిధులు సాఫ్ట్‌బ్యాంక్‌ గ్రూపే సమకూర్చినట్లు పేర్కొన్నారు. భారత్‌లో ఉన్న యువ ఆవిష్కర్తలంతా ముందుకు రావాలని పిలపునిచ్చారు. అందుకు తమ మద్దతు ఉంటుందన్నారు. పేటీఎం, ఓలా, డెలివరీ, ఫ్లిప్‌కార్ట్‌, మీషో సహా పలు ప్రముఖ కంపెనీల్లో సాఫ్ట్‌బ్యాంక్‌ పెట్టుబడులు పెట్టింది. గత కొన్ని సంవత్సరాలుగా ఈ సంస్థ భారత్‌లో భారీ ఎత్తున పెట్టుబడులు పెడుతున్న విషయం తెలిసిందే.