DHFL acquisition: పూర్తిగా పిరామల్‌ పరమైన డీహెచ్‌ఎఫ్‌ఎల్‌

దిల్లీ: దివాలా సంస్థ దివాన్‌ హౌసింగ్‌ ఫైనాన్స్‌ లిమిటెడ్‌ (డీహెచ్‌ఎఫ్‌ఎల్‌) ఇక పూర్తిగా పిరామల్‌ గ్రూప్‌ పరమైంది. రుణదాతలకు రూ.34,250 కోట్లు చెల్లించడం ద్వారా పరిష్కార ప్రణాళిక ప్రకారం స్వాధీన ప్రక్రియ పూర్తయిందని పిరామల్‌ గ్రూప్ ప్రకటించింది. దీంతో దివాలా స్మృతి చట్టం కింద పరిష్కారమైన తొలి సంస్థ ఇదేనని పేర్కొంది. పిరామల్‌ క్యాపిటల్‌ అండ్‌ హౌసింగ్‌ ఫైనాన్స్‌ లిమిటెడ్‌(పీసీహెచ్‌ఎఫ్‌ఎల్‌), డీహెచ్‌ఎఫ్‌ఎల్‌ను విలీనం చేస్తామని తెలిపింది. తర్వాత ఏర్పడే సంస్థను పీసీహెచ్ఎఫ్‌ఎల్‌గానే వ్యవహరిస్తామని పేర్కొంది.

డీహెచ్‌ఎఫ్‌ఎల్‌ ఆర్థిక సంక్షోభంలోకి జారుకోవడంతో 2019 నవంబరులో ఆర్‌బీఐ దివాలా పరిష్కార చర్యలకు ఆదేశించింది. దివాలా చట్టంలోని సెక్షన్‌ 227 ద్వారా సంక్రమించిన ప్రత్యేక అధికారాలను ఉపయోగించుకుని ఆర్‌బీఐ దివాలా పరిష్కార చర్యలకు ఆదేశించిన తొలి ఫైనాన్స్‌ కంపెనీ ఇదే.