GAIL: డివిడెండ్‌ చెల్లింపుల్లో గెయిల్‌ రికార్డు

దిల్లీ: గెయిల్‌ ఇండియా లిమిటెడ్‌ రెండో మధ్యంతర డివిడెండ్‌ను ప్రకటించింది. ఈ ఆర్థిక సంవత్సరంలో ఇది రెండో డివిడెండ్‌. డివిడెండ్‌ రూపంలో ఒక్కో షేరుకు రూ.5 చొప్పున మొత్తం రూ.2,220.19 కోట్లు వాటాదారులకు గెయిల్‌ చెల్లించనుంది. మార్చి 11న సమావేశమైన సంస్థ బోర్డు ఈ మేరకు నిర్ణయం తీసుకుంది.

ఈ ఏడాదిలో ఇప్పటికే ఓసారి ఒక్కో షేరుపై రూ.4 డివిడెండ్‌ను ప్రకటించింది. రెండు మధ్యంతర డివిడెండ్‌తో కలిసి మొత్తం ఒక్కో షేరుకు ఈ ఏడాది రూ.9 డివిడెండ్‌ చెల్లించింది. అంటే మొత్తం డివిడెండ్ల చెల్లింపులకు సంస్థ ఈ సంవత్సరం రూ.3,996.35 కోట్లు కేటాయించింది. గెయిల్‌ చరిత్రలో ఇంత మొత్తం డివిడెండ్‌ చెల్లించడం ఇదే తొలిసారని సంస్థ ఛైర్మన్‌, ఎండీ మనోజ్‌ జైన్‌ తెలిపారు. ప్రస్తుతం ప్రభుత్వానికి సంస్థలో 51.54 శాతం వాటా ఉంది. ఈ లెక్కన సర్కార్‌కు డివిడెండ్‌ రూపంలో రూ.1,142.29 కోట్లు వెళ్లనున్నాయి. మిగిలిన రూ.1,077.90 కోట్లు ఇతర వాటాదారులకు పంచనున్నారు.