అల్ట్రాటెక్‌ సిమెంట్‌ డివిడెండ్‌ 700%

జనవరి- మార్చి లాభం రూ.2,258.60 కోట్లు

దిల్లీ: ఆదిత్య బిర్లా గ్రూప్‌ సంస్థ అల్ట్రాటెక్‌ సిమెంట్‌, జనవరి- మార్చి త్రైమాసిక నికర లాభం ఏకీకృత పద్ధతిలో 35.24% పెరిగి రూ.2,258.58 కోట్లకు చేరింది. 2022-23 ఇదే త్రైమాసికంలో సంస్థ నికర లాభం రూ.1,670.10 కోట్లే. ఇంధన, ముడి సరుకు వ్యయాలు తగ్గడం, నిర్వహణ సామర్థ్యం, విక్రయాలు పెరగడం ఇందుకు దోహదం చేశాయి. ఇదే సమయంలో కార్యకలాపాల ద్వారా ఆదాయం రూ.18,662.38 కోట్ల నుంచి 9.41% పెరిగి రూ.20,418.94 కోట్లకు చేరింది. మొత్తం వ్యయాలు 6.7% పెరిగి రూ.17,381.09 కోట్లుగా నమోదయ్యాయి. ఇతర ఆదాయంతో కలిపి మొత్తం ఆదాయం 9.42% పెరిగి రూ.20,554.55 కోట్లకు  చేరింది. సిమెంటు రవాణా, విద్యుత్‌ వ్యయాలు 2%, ఇంధన వ్యయాలు 21%, ముడి సరకు వ్యయాలు 15% తగ్గాయని అల్ట్రాటెక్‌ సిమెంట్‌ తెలిపింది.

•  ఏకీకృత విక్రయాలు 33.22 మిలియన్‌ మెట్రిక్‌ టన్నుల నుంచి 11% పెరిగి 35.08 మిలియన్‌ మెట్రిక్‌ టన్నులకు చేరాయి.
•  దేశీయ విక్రయాలు 11% పెరగ్గా, సామర్థ్య వినియోగం 98 శాతంగా ఉందని కంపెనీ తెలిపింది.
•  పూర్తి ఆర్థిక సంవత్సరానికి (2023-24) అల్ట్రాటెక్‌ సిమెంట్‌ నికర లాభం 38.05% పెరిగి రూ.7,003.96 కోట్లకు చేరింది. 2022-23లో నికర లాభం రూ.5,073.40 కోట్లుగా నమోదైంది. మొత్తం ఆదాయం 12.21% వృద్ధితో రూ.71,525.09 కోట్లకు చేరింది.
•  అల్ట్రాటెక్‌ బిల్డింగ్‌ సొల్యూషన్స్‌ (యూబీఎస్‌) విక్రయ కేంద్రాలు 3,952కు చేరాయి. ఇవి 6.2 మిలియన్‌ మెట్రిక్‌ టన్నుల సిమెంటును విక్రయించాయి. మొత్తం విక్రయాల్లో వీటి వాటా 28%.
•  రూ.10 ముఖ విలువ గల ఒక్కో షేరుపై రూ.70 (700%) డివిడెండును డైరెక్టర్ల బోర్డు సిఫారసు చేసింది.

సోమవారం బీఎస్‌ఈలో అల్ట్రాటెక్‌ సిమెంట్‌ షేరు 2.7% పెరిగి రూ.9,962.25 వద్ద ముగిసింది.