రెనో నుంచి 5 కొత్త వేరియంట్లు

 ధరల శ్రేణి రూ.4.69-10.99 లక్షలు
మూడేళ్లలో విపణిలోకి 5 కొత్త కార్లు

దిల్లీ: ఫ్రెంచ్‌ వాహన తయారీ సంస్థ రెనో.. తన క్విడ్‌, ట్రైబర్‌, కైగర్‌ మోడళ్లలో 5 కొత్త వేరియంట్లను మంగళవారం దేశీయ విపణిలోకి విడుదల చేసింది. వీటి ధరల శ్రేణి రూ.4.69-10.99 లక్షలు (ఎక్స్‌-షోరూమ్‌). మరింతమంది వినియోగదార్లను ఆకట్టుకునేందుకు ఈ వేరియంట్లను తీసుకొచ్చినట్లు కంపెనీ తెలిపింది. దేశంలో వాహనాలకు గిరాకీ పెరుగుతున్నందున, వచ్చే మూడేళ్లలో మరో 5 కొత్త కార్లను దేశీయ మార్కెట్లోకి ప్రవేశపెడతామని రెనో ఇండియా ఆపరేషన్స్‌ కంట్రీ సీఈఓ, ఎండీ వెంకట్రామ్‌ మామిళ్లపల్లి వెల్లడించారు. ఇందులో సరికొత్త మోడళ్లతో పాటు కైగర్‌, ట్రైబర్‌లలో తదుపరి తరం వాహనాలు ఉంటాయని వివరించారు.

ఈ ఏడాది రెండంకెల వృద్ధి ఆశిస్తున్నాం: గత ఏడాది సంస్థ అనేక సవాళ్లను ఎదుర్కోవడంతో విక్రయాలు తగ్గాయి. ఈ ఏడాది వ్యాపారం పుంజుకోవచ్చనే అభిప్రాయాన్ని వెంకట్రామ్‌ వ్యక్తం చేశారు. గత ఏడాది సంస్థ దేశీయ విపణిలో 49,000 వాహనాలను విక్రయించింది. 28,000 కార్లను అంతర్జాతీయ విపణికి ఎగుమతులు చేసింది. ఈ ఏడాది రెండంకెల వృద్ధిపై దృష్టి సారించామని, అందుకే ప్రస్తుత ఉత్పత్తుల శ్రేణిలో కొత్త వేరియంట్లు తీసుకొచ్చామని వెంకట్రామ్‌ వెల్లడించారు.