మహీంద్రా సరికొత్త ట్రక్కులు

డీజిల్‌, సీఎన్‌జీ విభాగాల్లో లభ్యం
ధర రూ.6.61-6.93 లక్షలు

దిల్లీ: మహీంద్రా అండ్‌ మహీంద్రా(ఎం అండ్‌ ఎం) సరికొత్త ట్రక్కులను ఆవిష్కరించింది. ‘సుప్రో ప్రాఫిట్‌ ట్రక్‌ ఎక్సెల్‌’ను డీజిల్‌, సీఎన్‌జీ డ్యుయో వేరియంట్లలో మార్కెట్లోకి తీసుకొచ్చింది. వీటి ధరలు రూ.6.61-6.93 లక్షల మధ్య ఉన్నాయి. చిన్న వాణిజ్య వాహనాల(ఎస్‌సీవీ) విభాగంలో వచ్చే ఆర్థిక సంవత్సరమూ వృద్ధి కొనసాగుతుందని కంపెనీ అంచనా వేస్తోంది. పరిశ్రమ 5-10 శాతం మేర వృద్ధి చెందొచ్చని, అంత కంటే మెరుగ్గా తాము రాణిస్తామని మహీంద్రా ఆటో వైస్‌ ప్రెసిడెంట్‌, హెడ్‌ ఆఫ్‌ సేల్స్‌ బనేశ్వర్‌ బెనర్జీ పేర్కొన్నారు. రాబోయే నెలల్లో పిక్‌-అప్‌ శ్రేణిలో ఎయిర్‌ కండిషనింగ్‌ మోడళ్లు తీసుకు రావాలన్న ప్రణాళికలో ఉన్నట్లు తెలిపారు. 2 టన్నుల్లోపు విభాగంలో ఈ ఆర్థిక సంవత్సరంలో పరిశ్రమ 22% క్షీణతను నమోదు చేయనుండగా.. మహీంద్రా మాత్రం 22% వృద్ధిని నమోదు చేయనుందని ఆయన అన్నారు.