మారుతీ సెలెరియోలో ఎస్‌-సీఎన్‌జీ

దిల్లీ: సెలెరియో మోడల్‌లో సీఎన్‌జీ వేరియంట్‌ను విడుదల చేసినట్లు మారుతీ సుజుకీ సోమవారం వెల్లడించింది. దీని ధర రూ.6.58 లక్షలుగా (ఎక్స్‌షోరూమ్‌, దిల్లీ) నిర్ణయించింది. కె-సిరీస్‌ 1.0 లీటర్‌ ఇంజిన్‌తో రూపొందిన సరికొత్త సెలెరియోను ఎస్‌-సీఎన్‌జీ సాంకేతికతతో రూపొందించినట్లు కంపెనీ వెల్లడించింది. కిలో సీఎన్‌జీతో 35.60 కిలోమీటర్ల మైలేజీ వస్తుందని, సీఎన్‌జీ ట్యాంక్‌ సామర్థ్యం 60 లీటర్లు ఉంటుందని పేర్కొంది. ‘దేశంలో పర్యావరణ హిత ఇంధనాలతో నడిచే వాహనాల సంఖ్య క్రమంగా పెరుగుతున్న నేపథ్యంలో, మేము కూడా ఈ రంగంలో బలోపేతం అయ్యేందుకు సెలెరియోలో ఎస్‌-సీఎన్‌జీ సాంకేతికత తీసుకొచ్చామ’ని మారుతీ సీనియర్‌ ఎగ్జిక్యూటివ్‌ డైరెక్టర్‌ (మార్కెటింగ్‌, విక్రయాలు) శశాంక్‌ శ్రీవాస్తవ వెల్లడించారు.