Gift: శిక్షకుడు, పనివాళ్లు, చోదకుడికి..రూ.3.95 కోట్ల షేర్ల బహుమానం

ఐడీఎఫ్‌సీ ఫస్ట్‌ బ్యాంక్‌ ఎండీ, సీఈఓ ఉదారత

దిల్లీ: ఐడీఎఫ్‌సీ ఫస్ట్‌ బ్యాంక్‌ ఎండీ, సీఈఓ వైద్యనాథన్‌ రూ.3.95 కోట్లకు పైగా విలువైన 9 లక్షల బ్యాంక్‌ షేర్లను తనకు సహాయకులుగా వ్యవహరిస్తున్న అయిదుగురికి బహుమానంగా అందించారు. ఇందులో తన శిక్షకుడు (ట్రైనర్‌), పనివాళ్లు, చోదకుడు ఉన్నారు. వీరెవరికీ ఈ ప్రైవేటు రంగ బ్యాంక్‌తో ఎలాంటి సంబంధం లేదు.

* శిక్షకుడు రమేశ్‌ రాజుకు 3 లక్షల షేర్లు, ఇంటి పనిలో సాయం చేసే ప్రంజల్‌ నర్వేకర్‌కు 2 లక్షల షేర్లు, చోదకుడు అల్గార్‌సామి సి.మునాపర్‌కు 2 లక్షల షేర్లు, కార్యాలయ సిబ్బంది దీపక్‌ పథారేకు లక్ష షేర్లు, ఇంటి పనిలో సాయం చేసే మరో వ్యక్తి సంతోష్‌ జోగలేకు లక్ష షేర్లు బహుమానంగా అందించారు. బీఎస్‌ఈలో సోమవారం షేరు ముగింపు ధర రూ.43.90 ప్రకారం, ఈ 9 లక్షల షేర్ల విలువ రూ.3,95,10,000గా ఉంది.