బ్యాంక్‌ ఆఫ్‌ ఇండియా లాభంలో 142% వృద్ధి

దిల్లీ: మార్చి త్రైమాసికంలో స్టాండలోన్‌ పద్ధతిలో బ్యాంక్‌ ఆఫ్‌ ఇండియా (బీఓఐ) నికర లాభం 142.31 శాతం పెరిగి రూ.606 కోట్లుగా నమోదైంది. 2020-21 ఇదే త్రైమాసికంలో నికర లాభం రూ.250 కోట్లుగా ఉంది. మొత్తం ఆదాయం రూ.11,155.53 కోట్ల నుంచి పెరిగి రూ.11,443.46 కోట్లకు చేరింది. నికర వడ్డీ ఆదాయం రూ.2,936 కోట్ల నుంచి 35.77 శాతం పెరిగి రూ.3,986 కోట్లకు చేరింది. నికర వడ్డీ మార్జిన్‌ 2.01% నుంచి 2.58 శాతానికి మెరుగయ్యింది. స్థూల నిరర్థక ఆస్తులు 13.77%(రూ.56,535 కోట్లు) నుంచి 9.98 శాతానికి (రూ.45,605 కోట్లు) తగ్గాయి. నికర నిరర్థక ఆస్తులు 3.35%నుంచి తగ్గి 2.34 శాతానికి పరిమితమయ్యాయి. పూర్తి ఆర్థిక సంవత్సరానికి బీఓఐ నికర లాభం రూ.2,160 కోట్ల నుంచి 57.60% అధికమై రూ.3,405 కోట్లకు చేరింది. రూ.10 ముఖ విలువ గల ఒక్కో షేరుపై రూ.2 డివిడెండు చెల్లిస్తారు.