ప్రవాసులకు ఊరట..

ఇ-అడ్వాన్స్‌ రూలింగ్‌ ప్రారంభం

ప్రవాస పన్ను చెల్లింపుదారుల వివాదాలను వేగంగా పరిష్కరించేందుకు వీలుగా ‘ఇ-అడ్వాన్స్‌ రూలింగ్‌ స్కీం’ను అందుబాటులోకి తీసుకొచ్చినట్లు కేంద్ర ప్రత్యక్ష పన్నుల బోర్డు (సీబీడీటీ) వెల్లడించింది. ‘ఇ-అడ్వాన్స్‌ రూలింగ్‌ స్కీం 2022’లో భాగంగా బోర్డ్‌ ఫర్‌ అడ్వాన్స్‌ రూలింగ్స్‌ ఎదుట వాదనలు వీడియో కాన్ఫరెన్స్‌, వీడియో టెలిఫోనీ ద్వారా వినిపించేందుకు వీలుందని పేర్కొంది. దీనికోసం ముందుగానే ఇ-మెయిల్‌లో దరఖాస్తు చేసుకోవాలని సూచించింది. ప్రవాస భారతీయులు, నిర్దేశిత పన్నుచెల్లింపుదారులకు సంబంధించి లావాదేవీలపై ఆదాయపు పన్నుకు సంబంధించిన అనుమానాలు వచ్చినప్పుడు, వాటిని పరిష్కరించేందుకు వీలుగా ఈ అడ్వాన్స్‌ రూలింగ్‌ స్కీంను ఏర్పాటు చేశారు. కొత్త మార్పుల ప్రకారం పన్ను చెల్లింపుదారులు, ఆదాయపు పన్ను అధికారులు, అడ్వాన్స్‌ రూలింగ్‌ బోర్డుకు సంబంధించిన సమాచారం అంతా ఎలక్ట్రానిక్‌ విధానంలో జరుగుతుంది. బోర్డ్‌ ఫర్‌ అడ్వాన్స్‌ రూలింగ్స్‌ నుంచి దరఖాస్తుదారులకు సమాచారమంతా నమోదిత ఇ-మెయిల్‌కు పంపిస్తారు. ఆ తర్వాత దరఖాస్తుదారుడు లేదా అతని ప్రతినిధి తమ సమాధానాలను ఎలక్ట్రానిక్‌ కమ్యూనికేషన్‌ విధానంలోనే పంపించాల్సి ఉంటుంది. భారత్‌ వెలుపల ఉన్న ఎంతోమంది పన్ను చెల్లింపుదారులు, సంస్థలకు ఇ- అడ్వాన్స్‌ రూలింగ్‌ ప్రయోజనం కలిగించనుంది.