Scam alert: కొత్త మోసం! చలాన్‌ పేరిట మెసేజులు.. క్లిక్‌ చేస్తే అంతే!

ఇంటర్నెట్ డెస్క్‌: సైబర్‌ నేరగాళ్లు ఎప్పటికప్పుడు కొత్త ఎత్తుగడలు వేస్తున్నారు. సందర్భాలను బట్టి కొత్త పంథాల్లో జనాల నుంచి డబ్బులు కొట్టేస్తున్నారు. ఇటీవల కాలంలో ట్రాఫిక్‌ చలాన్‌లకు సంబంధించి ఇ- చలాన్‌ల (E-Challan Scam) పేరిట కొత్త రకం మోసాలకు పాల్పడుతున్నారు. వాహనదారులకు వ్యక్తిగత సందేశాలు పంపించి డబ్బులు కొట్టేస్తున్నారు. ఇలాంటి మోసాల పట్ల అప్రమత్తంగా (Scam alert) ఉండాలని ప్రభుత్వ, పోలీసు వర్గాలు హెచ్చరిస్తున్నాయి.

ఇటీవల కాలంలో సైబర్‌ నేరగాళ్లు (Cyber fraudsters)ఇ-చలాన్‌ల పేరిట వ్యక్తులకు సందేశాలు పంపుతున్నారు. అందులోనే ఓ పేమెంట్‌ లింక్‌ను కూడా ఉంచుతున్నారు. ఎవరైనా నిజమేనని నమ్మి ఆ లింక్‌ను లింక్‌ క్లిక్‌ చేస్తే బ్యాంకు ఖాతా వివరాలను హ్యాక్‌ చేసి అందులోని డబ్బులును కొట్టేస్తున్నారని పోలీసులు చెప్తున్నారు. కాబట్టి ఇలాంటి సందేశాల పట్ల జాగ్రత్తగా వ్యవహరించాలని సూచిస్తున్నారు.

తక్కువ ధరకే విమాన టికెట్‌ పొందేలా.. గూగుల్‌లో కొత్త ఫీచర్లు!

సాధారణంగా చలాన్‌ల పేరిట వచ్చే మెసేజుల్లో వాహనం నంబర్‌, ఇంజిన్‌, ఛాసిస్‌ నంబర్‌ వంటి వివరాలు ఉంటాయి. సైబర్‌ నేరగాళ్లు పంపించే వాటిలో ఆ వివరాలు ఏవీ ఉండవు. అలాగే, ఇలాంటి సందేశాలు సెల్‌ఫోన్‌ నంబర్ల నుంచి రావనేది గుర్తుంచుకోవాలని పోలీసులు చెప్తున్నారు. కాబట్టి ఇలాంటి సందేశాలు వచ్చేటప్పుడు తొలుత అధికారిక వెబ్‌సైట్‌కు వెళ్లి ఓ సారి తనిఖీ చేసుకోవాలని సూచిస్తున్నారు. చలాన్‌లకు సంబంధించిన అధికారిక వెబ్‌సైట్‌ను (https://echallan.parivahan.gov.in) పోలిన వెబ్‌సైట్లతో ఈ మోసాలకు పాల్పడుతుంటారని, కాబట్టి ఇలాంటి సందేశాలు వచ్చేటప్పుడు ఆ లింకులను కూడా క్షుణ్ణంగా పరిశీలించాలని చెప్తున్నారు. ఒకవేళ సైబర్‌ నేరానికి గురైతే వెంటనే 1930 నంబర్‌కు కాల్‌ చేయాలి. సంబంధిత బ్యాంకుకు కూడా సమాచారం ఇవ్వాలి. తర్వాత పోలీస్‌ స్టేషన్‌లో ఫిర్యాదు చేయాల్సి ఉంటుంది.