Crime news: ‘టీ’లో విషం కలిపి ముగ్గురు పిల్లలను హత్యచేసిన తల్లి

లఖ్‌నవూ‌: భర్తతో గొడవపడిన ఓ భార్య కోపం ముగ్గురు పిల్లల మరణానికి కారణమైంది. ఈ ఘటన ఉత్తర్‌ప్రదేశ్‌లోని ఘాజీపూర్‌లో జరిగింది. భర్త, అత్తింటివారితో గొడవపడిన సునీత యాదవ్‌ తన నలుగురు సంతానాన్ని తీసుకొని వారం రోజుల క్రితమే దంధాని గ్రామంలోని పుట్టింటికి వచ్చింది. సునీతకు, ఆమె భర్తకు రెండ్రోజుల క్రితం ఫోన్‌లో మళ్లీ గొడవ జరిగింది. దీంతో తీవ్ర మనస్థాపానికి గురైన సునీత తన ముగ్గురు సంతానికి తేనీరులో విషపదార్థం కలిపి ఇచ్చింది. ఫలితంగా తీవ్ర అనారోగ్యం పాలైన వారు ఆసుపత్రిలో చికిత్స పొందుతూ మృతిచెందారు. మృతుల్లో ఇద్దరు అబ్బాయిలు, ఓ బాలిక ఉంది. విషం కలిపిన టీ తాగడంతో హిమాన్షు యాదవ్‌(10), పీయూశ్‌ యాదవ్‌(8), సుప్రియ(5) మరణించినట్లు స్థానిక ఎస్పీ రోహన్‌ ప్రసాద్‌ వెల్లడించారు. నాలుగో కుమారుడు బయట ఆడుకుంటుండటంతో అతడికి తల్లి విషం కలిపిన ఆ టీని ఇవ్వలేదని పేర్కొన్నారు. కేసు నమోదు చేసుకొని దర్యాప్తు చేస్తున్నట్లు తెలిపారు.