10 కి.మీ నడిచి మరీ తండ్రిపై ఫిర్యాదు చేసింది

కేంద్రపరా: ఆరో తరగతి చదివే చిన్నారి.. పది కిలోమీటర్లు నడిచి మరీ తండ్రిపై ఫిర్యాదు చేసిన ఘటన ఒడిశాలో చోటుచేసుకుంది. తన హక్కుల పై అవగాహన ఉన్న ఈ బాలిక.. తనకు మధ్యాహ్న భోజన పథకం కింద ప్రభుత్వం అందచేస్తున్న డబ్బును తన తండ్రి కాజేస్తున్నాడని కేంద్రపడా జిల్లా కలెక్టరుకు ఫిర్యాదు చేసింది. కార్యాలయాన్ని చేరేందుకు గాను కాలినడకన పది కిలోమీటర్లు ప్రయాణించింది.

కొవిడ్-19 లాక్‌డౌన్‌ మొదలైనప్పటి నుంచి ప్రభుత్వం ప్రతి పాఠశాల విద్యార్థి ఖాతాలో రోజుకు రూ.8 చొప్పున అందచేస్తోంది. విద్యార్థికి బ్యాంకు ఖాతా లేనపుడు ఈ మొత్తం తల్లితండ్రులు లేదా సంరక్షకుల ఖాతాలో జమ అవుతుంది. అంతేకాకుండా రోజుకు 150 గ్రాముల బియ్యం కూడా ప్రతి విద్యార్థికీ లభిస్తుంది. కాగా, ఈ బాలిక తల్లి రెండు సంవత్సరాల క్రితం చనిపోయింది. తండ్రి మరో వివాహం చేసుకుని, బాలికను బయటకు నెట్టేయటంతో ఆ చిన్నారి తన మేనమామ వద్ద ఉంటోంది. 

తనను ఇంట్లో ఉండనివ్వకపోయినా.. తన తండ్రే ప్రభుత్వ ప్రయోజనాలను స్వాహా చేస్తున్నాడని బాలిక ఆరోపించింది. తనకు బ్యాంకు ఖాతా ఉన్నప్పటికీ.. అతను పాఠశాలకు వెళ్లి మరీ ప్రభుత్వం అందించే ప్రయోజనాలను తీసుకుంటున్నాడని వివరించింది. ఈ మేరకు బాలిక నుంచి లిఖిత పూర్వక ఫిర్యాదును స్వీకరించిన కలెక్టర్‌ సమర్థ్‌ వర్మ.. ఆ మొత్తాన్ని చిన్నారి బ్యాంకు ఖాతాకే అందేలాగా చూడాలని ఆదేశించారు. అంతే కాకుండా ఈ పథకం బియ్యాన్ని కూడా చిన్నారికే అందచేయాలని సంబంధిత అధికారులకు సూచించారు.