Crime News: నా సీటుపై కాలు వేస్తావా అంటూ కాల్చేశాడు..

షిగ్గాన్‌: సినిమా చూసి ఆనందించాల్సిన ఇద్దరు యువకుల మధ్య ‘సీటు’ యుద్ధం జరిగింది. అది కాస్తా తుపాకీతో కాల్చే స్థితికి వెళ్లింది. హవేరి జిల్లా షిగ్గాన్‌ (కర్ణాటక)లోని ‘కేజీయఫ్‌ ఛాప్టర్‌ 2’ సినిమా ప్రదర్శితమవుతున్న ఓ థియేటర్‌లో మంగళవారం రాత్రి ఈ ఘటన చోటుచేసుకొంది. ఏమైదంటే? ఓ యువకుడు తన ముందు సీటుపై కాలుపెట్టగా, ఆ సీటులో కూర్చొన్న వ్యక్తి సీరియస్‌ అయ్యాడు. ఇద్దరూ వాగ్వాదానికి దిగారు. అసహనానికి గురైన ముందు సీటు వ్యక్తి హుటాహుటిన బయటకు వెళ్లి ఓ తుపాకితో తిరిగొచ్చాడు. సీటుపై కాలుపెట్టిన యువకుడిపై మూడు రౌండ్లు కాల్పులు జరిపాడు. ఒక్కసారిగా థియేటర్‌లో గందరగోళం నెలకొనడంతో నిందితుడు అక్కడి నుంచి పరారయ్యాడు. గాయపడిన యువకుడికి హుబ్బళ్లిలోని ఓ ఆస్పత్రిలో చికిత్స జరుగుతుందని, రెండు బుల్లెట్లు అతని పొత్తికడుపులోకి దూసుకెళ్లాయని, ఎలాంటి ప్రాణాపాయం లేదని పోలీసులు తెలిపారు. ఈ ఘటనపై కేసు నమోదు చేశామని, నిందితుడి పట్టుకునే పనిలో ఉన్నామని వెల్లడించారు.