Crime news: భార్య చీర సరిగా కట్టుకోలేదంటూ భర్త ఆత్మహత్య!

ఔరంగాబాద్‌: తాను కట్టుకున్న భార్య సరిగా చీర కట్టుకోలేక పోతోందని పేర్కొంటూ ఆత్మహత్య చేసుకున్నాడో భర్త. ఈ ఘటన మహారాష్ట్రలోని ఔరంగాబాద్‌లో చోటుచేసుకుంది. పోలీసులు తెలిపిన వివరాల ప్రకారం.. సామధాన్‌ సాబ్లే (24) అనే వ్యక్తి ఔరంగాబాద్‌లోని ముకుంద్‌నగర్‌లో నివాసం ఉంటున్నాడు. తన భార్య పట్ల అసంతృప్తిగా ఉన్న అతడు ఇంట్లోనే సోమవారం ఉరి వేసుకొని ఆత్మహత్య చేసుకున్నట్టు ముకుంద్వాడీ పోలీస్‌ స్టేషన్‌ అధికారులు వెల్లడించారు. ‘‘అతడి గదిలో సూసైడ్‌ లెటర్‌ స్వాధీనం చేసుకున్నాం. తన భార్య సరిగా చీర కట్టుకోలేకపోతోందని, అలాగే, సరిగ్గా నడవడం/ మాట్లాడటం లేదు’’ అని ఆ లేఖలో పేర్కొన్నట్టు పోలీసులు వివరించారు. సాబ్లే ఆరు నెలల క్రితమే వయస్సులో తనకంటే ఆరేళ్లు పెద్దదైన మహిళను వివాహం చేసుకున్నట్టు పోలీసులు తెలిపారు. ఈ ఘటనపై తదుపరి దర్యాప్తు కొనసాగిస్తున్నట్టు పేర్కొన్నారు.