POCSO: పైశాచికం..చెట్టుకు కట్టేసి..బలవంతంగా మూత్రం తాగించి!

జోద్‌పూర్‌: బాలికను కలిసేందుకు రాత్రి పూట పక్క ఊరి నుంచి వచ్చాడన్న కారణంతో ఓ యువకుడిని అర్ధనగ్నంగా (half nake) చెట్టుకు కట్టేసి చావబాదారు. అక్కడితో ఆగకుండా బలవంతంగా మూత్రం తాగించారు. ఈ అమానవీయ ఘటన రాజస్థాన్‌ (Rajasthan)లోని జాలోర్‌ (Jalore)లో చోటు చేసుకుంది. పోలీసులు వెల్లడించిన వివరాల ప్రకారం.. బాలికను కలిసేందుకు సమీప గ్రామం నుంచి ఓ యువకుడు ఆదివారం రాత్రి వచ్చాడు. అది గమనించిన బాలిక బంధువులు అతడిని బంధించి చెట్టుకు కట్టేశారు. వద్దని మొరపెట్టుకుంటున్నావినకుండా చర్మం చిట్లేలా కొట్టారు. అతడిపై మూత్రం పోశారు. అక్కడితో ఆగకుండా ఓ సీసాలో మూత్రం నింపి బలవంతంగా తాగించారు.

ఈలోగా విషయం తెలుసుకున్న బాధితుడి తల్లిదండ్రులు, బంధువులు అక్కడికి చేరుకున్నారు.యువకుడిని విడిచిపెట్టాలని ఎంత ప్రాధేయపడినా వినలేదు. చివరికి గ్రామపెద్దలు కలగజేసుకొని ఇరువర్గాలవారినీ అక్కడి నుంచి పంపించేశారు. అయితే, ఘటనకు సంబంధించి తొలుత ఎలాంటి ఫిర్యాదు అందలేదని స్థానిక పోలీసులు తెలిపారు. దీనికి సంబంధించిన వీడియోలు సోమవారం నాటికి సామాజిక మాధ్యమాల్లో వైరల్‌గా మారడంతో దర్యాప్తు చేపట్టిన పోలీసులు బాధితుడి ఇంటికి వెళ్లి ఫిర్యాదు తీసుకున్నారు. ఈ ఘటనతో సంబంధం ఉన్న ఆరుగురిని అదుపులోకి తీసుకున్నట్లు జిల్లా ఎస్పీ తెలిపారు. మరోవైపు బాలిక ఇంటికి వెళ్లిన పోలీసులు ఆమె నుంచి వివరాలు సేకరించినట్లు చెప్పారు. బాధితుడిపై పోక్సో చట్టం ప్రకారం కేసు నమోదు చేసినట్లు తెలిపారు.