Road Accident: టూరిస్ట్‌ బస్సు బోల్తా: 22 మందికి గాయాలు

నందిగాం: డ్రైవర్‌ నిద్రమత్తు కారణంగా బస్సు బోల్తా పడిన ఘటన శ్రీకాకుళం జిల్లా నందిగాం మండలం పెద్దతామరాపల్లి వద్ద ఆదివారం అర్ధరాత్రి చోటుచేసుకుంది. ఈ ప్రమాదంలో పలువురికి గాయాలయ్యాయి. స్థానికులు, పోలీసులు తెలిపిన వివరాల ప్రకారం..  పశ్చిమబెంగాల్‌కు చెందిన పలువురు విహారయాత్ర కోసం టూరిస్ట్ బస్సులో కేరళకు బయలుదేరారు. శ్రీకాకుళం జిల్లా నందిగాం మండలం పెద్దతామరాపల్లి సమీపంలోకి రాగానే డ్రైవర్‌ నిద్రమత్తులోకి జారుకుని.. జాతీయ రహదారి పక్కనే ఉన్న కల్వర్టును ఢీ కొట్టాడు. దీంతో బస్సు ఒక్కసారిగా బోల్తా పడింది. 

ప్రమాదం జరిగిన సమయంలో బస్సులో డ్రైవర్‌తోసహా 39 మంది ఉన్నారు. వీరిలో 22మందికి గాయాలవ్వగా వారిని టెక్కలి జిల్లా ఆస్పత్రికి తరలించారు. క్షతగాత్రుల్లో నలుగురి పరిస్థితి మరింత విషమంగా ఉండటంతో వారిని శ్రీకాకుళం రిమ్స్‌కు తరలించారు. నందిగాం ఎస్సై మహ్మద్‌ యాసిన్‌ ఘటనా స్థలానికి చేరుకుని పరిశీలించారు. ఈ ఘటనపై కేసు నమోదు చేసుకుని దర్యాప్తు చేస్తున్నారు.