Road Accident: ఆటో-బస్సు ఢీ.. నలుగురు మహిళా కార్మికులు మృతి

చౌటుప్పల్‌ గ్రామీణం: యాదాద్రి జిల్లా చౌటుప్పల్‌ పరిధిలో రోడ్డు ప్రమాదం జరిగింది. దండుమల్కాపురం పారిశ్రామిక పార్కులో ఆటో-బస్సు ఢీకొనడంతో నలుగురు మహిళా కార్మికులకు తీవ్రంగా గాయపడ్డారు. ఆటోలోని మరో 8 మంది ప్రయాణికులకూ గాయాలయ్యాయి. దేవలమ్మ నాగారం నుంచి వస్తున్న ఆటోను అబ్దుల్లాపూర్‌మెట్‌ నుంచి వెళ్తున్న బస్సు ఢీకొనడంతో ఈ ప్రమాదం జరిగింది. 

తీవ్రంగా గాయపడిన నలుగురు మహిళల పరిస్థితి ఆందోళనకరంగా ఉండటంతో వారిని హైదరాబాద్‌లోని ఓ ప్రైవేట్‌ ఆస్పత్రికి తరలించారు. అక్కడ చికిత్స పొందుతూ నలుగురు మహిళా కార్మికులు మృతిచెందారు. మృతులను డాకోజి నాగలక్ష్మి (28), వరకాంతం అనసూయ(55), సిలివేరు ధనలక్ష్మి (35), దేవరపల్లి శిరీష(30)గా గుర్తించారు. మృతులంతా ఓ పచ్చళ్ల పరిశ్రమలో ఉపాధి పొందుతున్నట్లు స్థానికులు తెలిపారు. పోలీసులు ఘటనాస్థలానికి చేరుకుని పరిశీలించారు. సీఐ మల్లికార్జున్‌ రెడ్డి, ఎస్సై సీతాపాండు కేసు నమోదు చేసి దర్యాప్తు చేస్తున్నారు.