కూలిన మూడంతస్తుల భవనం..10 మంది మృతి

ముంబయి: మహారాష్ట్రలో ఘోర ప్రమాదం చోటుచేసుకుంది. మూడంతస్తుల భవనం కూలిన ఘటనలో కనీసం 10 మంది మృతి చెందారు. మృతుల్లో ఏడుగురు చిన్నారులు ఉన్నట్లు అధికారులు తెలిపారు. ఈ ఘటన భీవండిలోని పటేల్‌ కాంపౌండ్‌ ప్రాంతంలో సోమవారం తెల్లవారుజామున 3.40 సమయంలో జరిగింది. మరో 10 మంది శిథిలాల్లో చిక్కుకున్నట్లు థానె మున్సిపల్‌ కార్పొరేషన్‌ అధికారులు తెలిపారు. ఇప్పటికే ఓ 25 మందిని స్థానికులు కాపాడారు. వెంటనే ఘటనా స్థలానికి చేరుకున్న ఎన్‌డీఆర్‌ఎఫ్‌ బృందాలు సహాయక చర్యలు కొనసాగిస్తున్నాయి. అందరూ నిద్రిస్తున్న సమయంలో ప్రమాదం జరగడంతో ప్రాణనష్టం ఎక్కువగా జరిగినట్లు తెలుస్తోంది. భవనం పురాతమైనది కావడం వల్లే ఇటీవల కురుస్తున్న వర్షాల ధాటికి కుప్పకూలినట్లు ప్రాథమిక అంచనా వచ్చారు. అయితే, జిలానీ భవన్‌గా పిలిచే ఈ నివాసం కూల్చివేయాల్సిన భవనాల జాబితాలో ఉందో.. లేదో.. తెలుసుకొని సరైన చర్యలు తీసుకుంటామని అధికారులు తెలిపారు.