తల్లిదండ్రుల కమిటీ తీర్మానంతోనే చెల్లింపులు

కళాశాలలో పనులను పరిశీలిస్తున్న బెన్నస్వామి

ముంచంగిపుట్టు, న్యూస్‌టుడే: మనబడి నాడు నేడు కింద ప్రభుత్వ కళాశాలల్లో చేపట్టిన పనులకు కళాశాలలో తల్లిదండ్రుల కమిటీ తీర్మానం చేశాకే చెల్లింపులు చేపట్టాలని ఇంటర్మీడియట్‌ బోర్డు జిల్లా అధికారి బెన్నస్వామి సూచించారు. శుక్రవారం ఆయన ముంచంగిపుట్టు ప్రభుత్వ జూనియర్‌ కళాశాలను ఆకస్మికంగా సందర్శించారు. కళాశాలలో చేపడుతున్న నాడు - నేడు పనులను పరిశీలించారు. నిబంధనలు అనుసరించి సకాలంలో నిర్మాణ పనులు పూర్తి చేయాలని ఆదేశించారు. విద్యార్థులకు బోధిస్తున్న తీరుపై ఆరా తీశారు. ఈ నెల 12 నుంచి 17వ తేదీ వరకు జరిగే అర్ధ సంవత్సర పరీక్షలను పకడ్బందీగా నిర్వహించాలని చెప్పారు. కళాశాల సిబ్బంది తదితరులు పాల్గొన్నారు.