కూటమికి మద్దతుగా వేల కి.మీ. బైకుపై ప్రచారం

నర్సీపట్నం అర్బన్‌, న్యూస్‌టుడే: తెదేపా, భాజపా, జనసేన కూటమి విజయాన్ని కాంక్షిస్తూ పల్నాడు జిల్లాకు చెందిన ఎన్టీఆర్‌ వీరాభిమాని ప్రత్తిపాటి నాగ బాలాజీ బైక్‌పై రాష్ట్రమంతా తిరుగుతూ ప్రచారం చేస్తున్నారు. నాగార్జునసాగర్‌ నుంచి శ్రీకాకుళం జిల్లా ఇచ్ఛాపురం వరకు అసెంబ్లీ నియోజకవర్గాలను కలుపుతూ బైకుపై ప్రచార యాత్ర ఈ ఏడాది మార్చి ఒకటో తేదీన శ్రీకారం చుట్టారు. శిరస్త్రాణంపై గ్లాసు, సైకిల్‌, కమలం గుర్తులు, మెడలో మూడు పార్టీల కండువాలు, ముఖానికి రంగులు పూసుకుని ఖాకీ దుస్తుల్లో ఓటర్లను ఆకట్టుకుంటున్నారు. తనతోపాటు ఓ కొండముచ్చునూ తిప్పుతున్నారు. అనకాపల్లి జిల్లా నర్సీపట్నం చేరుకున్న ఆయన బుధవారం మాట్లాడుతూ.. జనసేన పార్టీ అంటే ఇష్టం. ఆ పార్టీతోపాటు కూటమిలోని తెదేపా, భాజపా అభ్యర్థులను గెలిపించాలని కోరుతూ ప్రచారం చేస్తున్నా. ఇప్పటికి సుమారు రెండు వేల కి.మీ. దూరం ప్రయాణించినట్లు చెప్పారు. వైకాపా నాయకులు ఓటర్లను ఎన్ని ప్రలోభాలకు గురిచేయాలని చూసినా ఈసారి జగన్‌ను నమ్మరని పేర్కొన్నారు. చంద్రబాబు సీఎం అయితేనే రాష్ట్రానికి మేలు జరుగుతుందని అందరూ విశ్వసిస్తున్నారని చెప్పారు. గతంలో మా నాన్న భాస్కరరావు తెదేపాకు మద్దతుగా పది వేల కి.మీ. సైకిల్‌పై తిరుగుతూ ప్రచారం చేశారని, ఆయన స్ఫూర్తితోనే బైక్‌ ప్రచారం ప్రారంభించినట్లు వెల్లడించారు.