ఎంటీఎస్‌ ఉపాధ్యాయులకు తొలగింపు ఉత్తర్వులు

పాడేరు పట్టణం, న్యూస్‌టుడే: ఎంటీఎస్‌ (మినిమం టైం స్కేల్‌) ప్రాతిపదికన పనిచేస్తున్న డీఎస్సీ-98, 2008 ఉపాధ్యాయులను తొలగిస్తూ జిల్లా నోడల్‌ విద్యాశాఖాధికారి చంద్రకళ మంగళవారం ఉత్తర్వులు జారీ చేశారు. విశాఖపట్నంతోపాటు అనకాపల్లి, అల్లూరి సీతారామరాజు జిల్లాల పరిధిలో ఉన్న అభ్యర్థులకు 2023-24 విద్యా సంవత్సరంలో 11 నెలలు పనిచేసేలా గతేడాది జూన్‌ 24వ తేదీన నియామక ఉత్తర్వులు జారీ చేశారు. ఈ మూడు జిల్లాల్లో సుమారు 400 మంది ఎంటీఎస్‌ ఎస్జీటీలుగా పనిచేస్తున్నారు. టెర్మినేషన్‌ ఉత్తర్వుల ప్రకారం ఏప్రిల్‌ 30 వరకు వీరు విధుల్లో కొనసాగనున్నారు. 2024-25 విద్యా సంవత్సరం ప్రారంభంలో వీరి సేవలను ప్రభుత్వం మళ్లీ వినియోగించుకోనుంది. ఏటా 11 నెలల పాటు కొనసాగించి వేసవి సెలవుల్లో తమని విధుల నుంచి తప్పించడం బాధాకరమని, శాశ్వత ఉపాధ్యాయులుగా పరిగణించాలని ఎంటీఎస్‌ ఉపాధ్యాయులు ప్రభుత్వాన్ని కోరుతున్నారు.