ఫ్యాన్‌ రెక్కలు విరగడం ఖాయం : బొండా

ఉమామహేశ్వరరావు

మొగల్రాజపురం (చుట్టుగుంట), న్యూస్‌టుడే : మరో రెండు నెలల్లో జరిగే ఎన్నికల్లో వైకాపా ఫ్యాన్‌ రెక్కలు విరిగి, ముక్కలవుతుందని తెదేపా, జనసేన, భాజపా కూటమి మధ్య నియోజకవర్గ ఎమ్మెల్యే అభ్యర్థి బొండా ఉమామహేశ్వరరావు పేర్కొన్నారు. శనివారం ఆయన మొగల్రాజపురంలో విలేకరులతో మాట్లాడారు. ఎన్నికల కోడ్‌ అమల్లోకి రావడంతో.. రాష్ట్ర ప్రజలకు రాక్షస పాలన నుంచి విముక్తి లభించిందన్నారు. మరో 45 రోజుల్లో పూర్తి స్వేచ్ఛ వస్తుందని పేర్కొన్నారు. జగన్‌మోహన్‌రెడ్డిని ఇంటికి పంపడానికి ప్రజలు సిద్ధంగా ఉన్నారన్నారు. అయిదేళ్ల విధ్వంసక, విద్వేష పాలనతో రాష్ట్రాన్ని అన్ని విధాల నాశనం చేరని విమర్శించారు. ఎస్సీ, ఎస్టీలకు చెందిన 28 పథకాలు, బీసీలకు 30 పథకాలు, మైనార్టీలకు చెందిన 11 పథకాలను రద్దు చేసి.. వందలాది మందిపై మారణహోమం సృష్టించారని పేర్కొన్నారు. జగన్‌ పాలనకు ముగింపు పలికే సమయం శనివారంతో మొదలైందన్నారు. ప్రజలంతా ముక్తకంఠంతో బైబై జగన్‌ అంటున్నారని ఎద్దేవా చేశారు. ఆయనకు శాశ్వతంగా రాజకీయ సమాధి కడతారని పేర్కొన్నారు. అన్నకు ఓటు వేయవద్దని సొంత చెల్లెళ్లే కోరుతున్నారని, ఇంతకంటే చెంపదెబ్బ ఏం ఉంటుందన్నారు. తాడేపల్లి ప్యాలెస్‌ నుంచే కాదు.. ఈ రాష్ట్రం నుంచి కూడా ప్రజలు తరిమి కొట్టే రోజులు దగ్గర్లో ఉన్నాయన్నారు. ఈ నెల 17న చిలకలూరిపేటలో నిర్వహించే ‘ప్రజాగళం’ సభకు ప్రజలు భారీ సంఖ్యలో తరలివచ్చి జయప్రదం చేయాలని ఉమా కోరారు. ఈ సమావేశంలో తెదేపా రాష్ట్ర కార్యదర్శి నవనీతం సాంబశివరావు, ఏఎంసీ మాజీ డైరెక్టర్‌ ఘంటా కృష్ణమోహన్‌ తదితరులు పాల్గొన్నారు.