బంగారు బిస్కెట్లు తరలిస్తున్న ఇద్దరి అరెస్టు

గుడిపాల, న్యూస్‌టుడే: పన్నులు చెల్లించకుండా బంగారు బిస్కెట్లు తరలిస్తున్న ఇద్దరు వ్యక్తులను కేంద్ర పరోక్ష పన్నులు, కస్టమ్స్‌ బోర్డు (సీబీఐసీ), డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ (డీఆర్‌ఐ) అధికారులు సోమవారం రాత్రి అరెస్టు చేశారు. ఇద్దరు వ్యక్తులు ఓ కారులో సుమారు 2.50 కేజీల బంగారాన్ని చెన్నై నుంచి చిత్తూరు మీదుగా  తీసుకెళుతున్నారని విజయవాడలోని డీఆర్‌ఐ అధికారులకు సమాచారం అందింది. దీంతో వారు గుడిపాల మండలం నరహరిపేట చెక్‌పోస్ట్‌ వద్ద స్థానిక పోలీసులతో కలిసి తనిఖీలు చేయిస్తుండగా ఓ కారు డ్రైవర్‌ ఆపకుండా వెళ్లే ప్రయత్నం చేశారు. చివరకు కారును గట్టిగా తట్టడంతో అద్దం పగిలింది. అనంతరం కారులో ఉన్న గుంటూరు జిల్లాకు చెందిన శ్రీనివాసులు, డ్రైవర్‌ రమేష్‌ను డీఆర్‌ఐ అధికారులు అరెస్టు చేశారు. బంగారు బిస్కెట్లతోపాటు వారిని విజయవాడకు తీసుకెళ్లినట్టు తెలుస్తోంది.