ఏళ్లు గడుస్తున్నా.. పరిహారం అందలేదు

నెహ్రూని కలిసిన పోలవరం భూ నిర్వాసిత రైతులు

నెహ్రూకు వినతిపత్రం అందజేస్తున్న రైతులు

గోకవరం, జగ్గంపేట, న్యూస్‌టుడే: పోలవరం నిర్వాసితులకు పునరావాసం కల్పించేందుకు తమ భూములు తీసుకొని ఏళ్లు గడుస్తున్న నేటికి పరిహారం అందించలేదని తమకు న్యాయం జరిగేలా చూడాలని గిరిజనేతర రైతులు కూటమి అభ్యర్థి జ్యోతుల నెహ్రూ వద్ద ఆవేదన వ్యక్తం చేశారు. తూర్పుగోదావరి జిల్లా గోకవరం మండలానికి చెందిన పలువురు రైతులు మంగళవారం జగ్గంపేటలో తెదేపా కార్యాలయం వద్దకు వచ్చి కూటమి అభ్యర్థి జ్యోతుల నెహ్రూను కలిశారు. రైతులు మాట్లాడుతూ.. ఏజెన్సీ ప్రాంతాల్లో పూర్వం నుంచి తమకు భూములు ఉన్నాయని పోలవరం ప్రాజెక్టులో ముంపునకు గురైన నిర్వాసితులకు కాలనీల నిర్మాణాలు, భూమికి భూమి ఇచ్చేందుకు తమ వద్ద నుంచి భూములు తీసుకున్నారన్నారు. తీసుకునే సమయంలో నష్ట పరిహారం చెల్లిస్తామని చెప్పారని తీరా తీసుకున్న తరువాత పరిహారం చెల్లించకపోగా వైకాపా పాలనలో మాపై కేసులు పెట్టారని వాపోయారు. దీనిపై నెహ్రూ స్పందిస్తూ.. త్వరలో కూటమి ప్రభుత్వం అధికారంలోకి వచ్చిన వెంటనే మీ సమస్య పరిష్కరించేందుకు చర్యలు చేపడతామని హామీ ఇచ్చారు. స్థానిక నాయకులు ఎస్‌.వి.ఎస్‌.అప్పలరాజు, కందుల చిట్టిబాబు తదితరులు ఉన్నారు.