సీఎం వస్తున్నారు.. మరి జనమో!

రోడ్‌షోకు వస్తే రూ.200 అంటూ వైకాపా బేరసారాలు

న్యూస్‌టుడే, వి.ఎల్‌.పురం: ముఖ్యమంత్రి జగన్‌మోహన్‌రెడ్డి సిద్ధం యాత్ర గురువారం కోనసీమ, తూర్పుగోదావరి జిల్లాల్లోకి ప్రవేశిస్తుంది. సీఎం రోడ్డుషోకు జనాలను తరలించేందుకు వైకాపా నాయకులు ఆపసోపాలు పడుతున్నారు. రాజమహేంద్రవరంలోని ఆయా డివిజన్లలో బేరసారాలు మొదలుపెట్టారు. రోడ్డుషోకు వచ్చే ఒక్కొక్కరికీ రూ.200 చొప్పున ఇస్తామంటూ జనసమీకరణ చేస్తున్నారు. రాజమహేంద్రవరం నగర పరిధిలో 22 డివిజన్ల మీదుగా సీఎం రోడ్డుషో జరగనుంది. ఒక్కొక్క డివిజన్‌ నుంచి 1,000 నుంచి 1,500 మందిని తరలించనున్నారు. రోడ్డుషో సాగే మార్గం వెంబడి జనాలను పెట్టేందుకు ఆయా డివిజన్ల పార్టీ ఇన్‌ఛార్జులు, నాయకులు బేరాలు సాగిస్తున్నారు.