మొదలైన నామినేషన్ల పర్వం

ఎంపీకి 5, ఎమ్మెల్యే స్థానాలకు 18 దాఖలు
నేడు, రేపు ప్రధాన పార్టీల అభ్యర్థుల నామపత్రాలు

కలెక్టరేట్‌(గుంటూరు), న్యూస్‌టుడే: సార్వత్రిక ఎన్నికలకు నోటిఫికేషన్‌ విడుదల కావడంతో గురువారం నుంచి జిల్లా వ్యాప్తంగా నామినేషన్ల పర్వం మొదలైంది. ఈ క్రమంలో నెల రోజులుగా పలు విధాలుగా ప్రచార కార్యక్రమాలు చేపట్టిన పార్టీలు ఇప్పటికే నామినేషన్‌ పత్రాలు పూర్తి చేసి మంచి ముహూర్తం కోసం వేచి ఉన్నారు. నేడు, రేపు ప్రధాన పార్టీల అభ్యర్థులు దాఖలు చేసేందుకు రంగం సిద్ధం చేసుకున్నారు. నామినేషన్ల తొలి రోజున గుంటూరు పార్లమెంట్‌ స్థానానికి పోటీ చేసే అభ్యర్థులు కలెక్టర్‌ కార్యాలయంలో నామినేషన్‌ పత్రాలు అందించారు. అసెంబ్లీ స్థానాలకు ఆయా నియోజకవర్గాల్లోని రిటర్నింగ్‌ అధికారి కార్యాలయాల్లో దాఖలు చేశారు. పొన్నూరు, తెనాలి నియోజకవర్గాలు మినహా మిగిలిన ఐదు నియోజకవర్గాలతో పాటు, పార్లమెంట్‌ స్థానానికి నామినేషన్లు పడ్డాయి. ఆయా పార్టీలు, స్వతంత్ర అభ్యర్థులు దాఖలు చేశారు. అత్యధికంగా మంగళగిరి అసెంబ్లీ నియోజకవర్గానికి 10 మంది అభ్యర్థులు 14 నామినేషన్లు దాఖలు చేశారు. గుంటూరు పార్లమెంట్‌ స్థానానికి పిరమిడ్‌ పార్టీ ఆఫ్‌ ఇండియా తరఫున అంబటి చలమయ్య, స్వతంత్ర అభ్యర్థులుగా డి.రత్నం, ఎ.గాయత్రి, ఎ.శ్రీకృష్ణ, షేక్‌ అస్లాంఅక్తర్‌లు నామినేషన్లు దాఖలు చేశారు.