YS Sharmila: ఎంత సహనంతో ఉన్నా మాపై వేధింపులు ఆగడం లేదు: వైఎస్‌ షర్మిల

హైదరాబాద్‌: తెలంగాణ పోలీసు వ్యవస్థ పూర్తిగా సీఎం కేసీఆర్‌ అధీనంలోకి వెళ్లిపోయిందని వైతెపా అధ్యక్షురాలు వైఎస్‌ షర్మిల ఆరోపించారు. తన ఆమరణ దీక్షను భగ్నం చేసి ఇంటి నుంచి బయటకు వెళ్లకుండా అడ్డుకున్నారని ఆక్షేపించారు. హైదరాబాద్‌లో నిర్వహించిన మీడియా సమావేశంలో ఆమె మాట్లాడారు. 

‘‘పోలీసుల భుజాన తుపాకీ పెట్టి నన్ను టార్గెట్‌ చేస్తున్నారు. వారిని కీలు బొమ్మల్లా వాడుకుంటున్నారు. ఎంత సహనంతో ఉన్నా మాపై వేధింపులు ఆగడం లేదు. లంచ్‌ మోషన్‌ పిటిషన్‌ కోసం హైకోర్టు వెళ్లేందుకు న్యాయవాదితో బయల్దేరినా పోలీసులు అడ్డుకున్నారు. కుటుంబపరంగా ఉన్న పనులు చేసుకోవడానికీ అనుమతించడం లేదు. నా ప్రాథమిక హక్కులను హరిస్తున్నారు. ఏ అధికారంతో నన్ను కట్టడి చేస్తున్నారు? అందుకే పోలీసు శాఖపైనే కేసు వేయాలని నిర్ణయం తీసుకున్నాం’’ అని షర్మిల తెలిపారు.