దేవాదాయ భూముల రక్షణకు సమష్టి కృషి

వికారాబాద్‌ కలెక్టరేట్‌: దేవాదాయ శాఖకు సంబంధించిన భూములు అన్యాక్రాంతం కాకుండా తగు జాగ్రత్తలు తీసుకోవాలని జిల్లా అదనపు పాలనాధికారి లింగ్యానాయక్‌ అన్నారు. గురువారం కలెక్టరేట్‌లోని తన ఛాంబర్‌లో ల్యాండ్‌ రెవెన్యూ కమిషనర్‌ ఆదేశాల మేరకు దేవాదాయ భూములపై రెవెన్యూ, దేవాదాయ శాఖాధికారులతో సమీక్షించారు. సర్వే నంబర్ల వారీగా భూముల వివరాలను అందించాలన్నారు. భూములు పరిరక్షణకు రెవెన్యూ, అటవీ శాఖాధికారులు సమన్వయంతో పని చేయాలని సూచించారు. ఈ సమావేశంలో దేవాదాయ శాఖ సహాయ కమిషనర్‌ శేఖర్‌, జిల్లా ఇన్‌స్పెక్టర్‌ మధుబాబు, అధికారులు మునీరుద్దీన్‌, గోవిందమ్మ, శివ, శ్రీనివాస్‌ పాల్గొన్నారు.

చీటీతో పాటు ఓటు సమాచార డైరీ అందజేత

కొడంగల్‌: లోక్‌సభ ఎన్నికలకు సంబంధించి గురువారం తహసీల్దార్‌ కార్యాలయంలో ఏర్పాటు చేసిన కార్యక్రమంలో జిల్లా అదనపు కలెక్టర్‌ లింగ్యానాయక్‌ మాట్లాడారు. పోలింగ్‌ చీటీలతో పాటు ప్రతి కుటుంబానికి పోలింగ్‌ సమాచార డైరీని అందించడం జరుగుతుందన్నారు. దీన్లో ఓటు హక్కు నమోదు, ఓటు వేసే విధానం, ఏ ఓటరు ఎలా వినియోగించుకోవాలి వంటి పలు అంశాలను క్లుప్తంగా వివరించామన్నారు. ఈ కార్యక్రమంలో తహసీˆల్దార్‌ బి.విజయ్‌కుమార్‌, మున్సిపల్‌ కమిషనర్‌ బల్‌రాంనాయక్‌, వివిధ పార్టీల నాయకులు పాల్గొన్నారు.