ముగిసిన చిలుకూరు బాలాజీ బ్రహ్మోత్సవాలు

మొయినాబాద్‌, న్యూస్‌టుడే: వారం రోజులుగా అట్టహాసంగా కొనసాగిన చిలుకూరు బాలాజీ దేవాలయం బ్రహ్మోత్సవాలు గురువారం చక్రస్నానం, ధ్వజావరోహణంతో ముగిశాయి. స్వామివారికి సర్వసైన్యాధిపతి అయిన చక్రస్వామి ఆధ్వర్యంలో చివరిరోజు ఆలయంలో ప్రత్యేక పూజలు నిర్వహించారు.  ఆలయంలో స్వామివారిని శ్రీదేవి, భూదేవి సమేతంగా అద్దాల పల్లకీలో ఆశీనులను చేసి ప్రత్యేకంగా అలంకరించారు. సమీపంలోని మండపంలో నవకలశ స్థాపనం, పాలికల పూజతో దేవుళ్లందరినీ ఆవాహనం చేసి సుగంధద్రవ్యాలతో నవకలశ అభిషేకం చేశారు. అనంతరం ధ్వజావరోహణం పూర్తిచేసి చక్రస్వామిని ఆలయ సమీపంలోని గండిపేట జలాశయంలో చక్రస్నానం చేయించి భక్తులందరికీ చక్రతీర్థాన్ని ఇచ్చారు. ఆలయ మేనేజింగ్‌ కమిటీ ఛైర్మన్‌ డాక్టర్‌ ఎంవీ సౌందరరాజన్‌, కన్వీనర్‌ గోపాలకృష్ణస్వామి, ఆలయ అర్చకుడు సీఎస్‌ రంగరాజన్‌, కృష్ణమాచార్యులు, రామాచార్యులు, కన్నయ్య, సురేష్‌, అనిల్‌, బాలాజీ, కిట్టు, నరసింహన్‌, గున్నాల మల్లారెడ్డి తదితరులు పాల్గొన్నారు.