జలదిగ్బంధంలో స్మారకాలు

జలదిగ్బంధంలో హంపీలోని మంటపాలు

హొసపేటె: హంపీలోని స్మారకాలు మరోసారి జలదిగ్బంధంలో చిక్కుకున్నాయి. తుంగభద్ర జలాశయం నుంచి 1.30 లక్షల క్యూసెక్కులదాకా నీటిని నదికి విడుదల చేయడంతో హంపీ సమీపంలో తుంగభద్ర నది ఉగ్రరూపం దాల్చింది. ఉద్ధృతంగా ప్రవహిస్తూ ప్రముఖ స్మారాలను చుట్టేసింది. ఇప్పటికీ నది తీరంలోని పిండ ప్రదాన మండపం, పురందరదాస మండపం, స్నానఘట్టాలు పూర్తిగా మునిగిపోయాయి. చక్రతీర్థ కోదండ రామాలయం మెట్లదాకా వరద నీరు వచ్చి చేరింది. సాలు మంటపాలు కూడా జలావృతమయ్యాయి. ఎదురు బసవణ్ణ ఆలయం నుంచి కోదండ రామాలయం, యంత్రోద్ధారక ఆంజనేయ స్వామి ఆలయాలకు వెళ్లే మార్గాలు పూర్తిగా జలావృతమయ్యాయి. భక్తులు అటువైపు రాకుండా పోలీసులు కట్టుదిట్టమైన చర్యలను తీసుకున్నారు. బుధవారం ఉదయానికల్లా తుంగభద్ర జలాశయం నుంచి సుమారు 2లక్షల క్యూసెక్కులదాకా విడుదల చేసే అవకాశం ఉన్నందున హంపీ పోలీస్‌స్టేషన్‌ ఎదురు బసవణ్ణ ఆలయాలు ముంపునకు గురయ్యే అవకాశం ఉంది. స్మారకాలు ఇలా ముంపునకు గురవడం నెలరోజుల్లో రెండో సారి.

హంపీలోని రామలక్ష్మల ఆలయం మెట్లను తాకిన తుంగభద్రమ్మ